કુખ્યાત ગોધરાની તાડપત્રી ગેંગનો મહેબુબ કાળો સિદ્દિકી પકડાયો : ટ્રક અને સામાન મળી 13.70 લાખનો મુદ્દામાલ જપ્ત
(વર્તમાન પ્રવાહ વાપી બ્યુરો)
વાપી, તા.19: વલસાડ ધરમપુર માલનપાડામાં ગત તા.11-01-2023ના રોજ કોસ્મેટીકના વેપારીએ ધરમપુર પો.સ્ટે. કોસ્મેટિક માલ સામાનની રૂા.9.26 લાખની ચોરી થયાની ફરિયાદ નોંધાવી હતી. દુકાન માલિક રોહીત સુરેશભાઈ ભદ્રાની ફરિયાદ બાદ એલ.સી.બી. એસ.ઓ.જી.ની ટીમે તપાસ હાથ ધરી હતી. જેમાં ગણતરીના દિવસમાં પોલીસે ચોરીનો ભેદ ઉકેલી કુખ્યાત ગોધરાની તાડપત્રી ગેંગનો આરોપી ઝડપી પાડયો છે.
ધરમપુરમાં હિન્દુસ્તાન લીવરની એજન્સી ધરાવતા રોહીત સુરેશભાઈ ભદ્રાના કોસ્મેટિક ગોડાઉનમાં ગત તા.10-01-2023ના રોજ રૂા.9,26,634ની શેમ્પુ- હેર ઓઈલ, ટુથપેસ્ટ જેવી કોસ્મેટિક સામાનની ચોરી થઈ હતી. ફરિયાદ બાદ પોલીસે હાથ ધરેલી ચાંપતી તપાસમાં ચોરીનો ભેદ ઉકેલી દીધો છે. ચોરીની રાતે ટ્રક ભરીને ચોરટાઓ ફરાર થઈ ગયા હતા તેનુ પગેરુ પોલીસે શોધી કાઢયું છે. ગોધરાની તાડપત્રી ગેંગ ટ્રકમાં સામાન ભરીને ગોધરા પહોંચી હતી. સમગ્ર ઘટના સી.સી.ટી.વી. કેમેરામાં કેદ થઈ હતી. ચોરીની મોડસ ઓપરેન્ડી આધારે પોલીસ ગોધરાની તાડપત્રી ગેંગ સુધી પહોંચી હતી. ગુનામાં વપરાયેલ ટ્રક નં.જીજે34 ટી 6395 સાથે આરોપી મહેબુબ કાળો સિદ્દીકી પકડી લેવાયો હતો તેમજ ટ્રક અને સામાન સાથે પોલીસે રૂા.13.70 લાખનો મુદ્દામાલ જપ્ત કરી વધુ તપાસ ધરમપુર પોલીસ કરી રહી છે.
