પોલીસે રેડ કરી જુગારીયા પાસેથી 10 હજાર રોકડાનો મુદ્દામાલ જપ્ત કરી આરોપીઓને જેલ ભેગા કર્યા
(વર્તમાન પ્રવાહ વાપી બ્યુરો)
વાપી, તા.23: વાપી જી.આઈ.ડી.સી. થર્ડ ફેઈઝ વિસ્તારના ફોર્ટીશેડની એક કંપની પાસે આવેલ ખુલ્લી જગ્યામાં આજે જી.આઈ.ડી.સી. પોલીસે રેડ કરીને જુગાર રમતા પાંચ આરોપીને ઝડપી પાડી કાયદેસરની કાર્યવાહી હાથ ધરી હતી.
પ્રાપ્ત વિગતો મુજબ જી.આઈ.ડી.સી. પોલીસને મળેલી ચોક્કસ બાતમી બાદ 40 શેડમાં આવેલ ડાલમીયા કંપની નજીક રેડ કરી હતી. ઘટના સ્થળે રામુ બાલુરામ પાલ રહે.નાસિક, મહારાજ શ્રીપાલ રાજ રહે.વાપી, સંજય કેશવભાઈ હરિજન રહે.છરવાડા વાપી, રાજેન્દ્ર રામસિંહ રહે.ચણોદ અને હરદેવ લોટુરામ ગોડ રહે.નાસિક નામના પાંચ ઈસમોને રંગે હાથ જુગાર રમતા ઝડપી પાડયા હતા. પોલીસે દાવ અને અંગ ઝડતી મળી કુલ રોકડા રૂા.10,020 નો મુદ્દામાલ ઝડપી પાડયો હતો. તમામ આરોપી વિરૂધ્ધ જુગાર ધારા હેઠળ કાર્યવાહી કરી જેલભેગા કરાયા હતા.
