(વર્તમાન પ્રવાહ ન્યુઝ નેટવર્ક)
દીવ, તા.28: દીવ એજ્યુકેશન ડિપાર્ટમેન્ટ, સમગ્ર શિક્ષા અભિયાન દ્વારા દીવ જિલ્લાના વિદ્યાર્થીઓ માટે ક્વીઝ કોમ્પિટિશનનું આયોજન કરવામાં આવ્યું હતું. દીવ કલેકટર ફવર્મન બ્રહ્માની અધ્યક્ષતા અને માર્ગદર્શનમાં દીવ જિલ્લાના વિદ્યાર્થીઓમાં જ્ઞાનનો સંચાર થાય તેને લઈને ક્વીઝ કોમ્પિટિશનનું આયોજન કરવામાં આવ્યું હતું. જેમાં અગાઉ દીવ ડિસ્ટ્રીકટની વિવિધ સ્કુલોમાં ક્વીઝ કોમ્પિટિશન કરવામાં આવી અને દરેક શાળામાંથી વિવિધ સ્તરે વિજેતા બનીને આજે જિલ્લા સ્તરીય ક્વીઝ કોમ્પિટિશનમાં 12 વિદ્યાર્થીઓ પહોંચ્યા હતા. ક્વીઝ કોમ્પિટિશન દરમિયાન છ ટીમ બનાવવામાં આવી હતી, જેમાં વિવિધ રાઉન્ડ દ્વારા ત્રણ ટીમ વિજેતા બન્યા હતા જેમાં પ્રથમ આર્યભટ્ટ ટીમ દ્વિતિય ટીમ રામાનુજન અને તૃતિય સ્થાને વિવેકાનંદ ટીમ વિજેતા થઈ હતી. પ્રથમને 8000, દ્વિતિયને 6000 અને તૃતિય વિજેતાને 4000 રૂપિયા રોકડ રકમ આપવામાં આવી હતી. આ ક્વીઝકોમ્પિટિશન ખૂબજ રસસ્પદ હતી. આ પ્રસંગે ડેપ્યુટી કલેકટર શિવમ મિશ્રા, મામલતદાર ધર્મેશ દમણિયા, ડિસ્ટ્રીકટ પંચાયત પ્રમુખ અમૃતાબેન અમૃતલાલ, નગરપાલિકા પ્રમુખ હેમલતાબેન દિનેશ, શિક્ષકગણ વિદ્યાર્થીઓ વગેરે ઉપસ્થિત રહ્યા હતા.
