10થી 20 વર્ષની વયજૂથમાં 10 કિ.મી.ની દોડમાં દાનહ ભારત સ્કાઉટ ગાઈડ સેલવાસની શ્રુતિ મૌર્ય પ્રથમ અને રેણુકા ચૌધરીએ મેળવેલું દ્વિતીય સ્થાન
(વર્તમાન પ્રવાહ ન્યુઝ નેટવર્ક)
દમણ, તા.13: કેન્દ્ર શાસિત પ્રદેશ દાદરા અને નગર હવેલી અને દમણ અને દીવ પ્રશાસન, સમાજ કલ્યાણ વિભાગ, દમણ દ્વારા આંતરરાષ્ટ્રીય મહિલા દિવસ નિમિત્તે ‘ગો ગર્લ્સ’ 3 અને 5 કિમી નાઇટ રનની ચોથી આવૃત્તિ દમણના સમુદ્ર કિનારે લાઇટ હાઉસ ખાતે યોજવામાં આવી હતી, જેમાં કુલ 1000થી વધુ બાળકો તથા મહિલાઓએ ઉત્સાહભેર ભાગ લીધો હતો.
દમણના દરિયા કિનારે યોજાયેલ નાઇટ રનમાં દાનહ ભારત સ્કાઉટ ગાઈડની શ્રુતિ મૌર્ય અને રેણુકા ચૌધરીએ 10 થી 20 વર્ષની વયજૂથમાં 10 કિલોમીટરની દોડમાં પ્રથમ સ્થાન અને રેણુકા ચૌધરીએ દ્વિતીય સ્થાન મેળવ્યું હતું. તેની સાથે 21થી 40 વર્ષની વયજૂથમાં સેલવાસના નિવાસી નાયબ કલેક્ટર અને દાનહ ભારત સ્કાઉટ ગાઈડ પ્રમુખ સુશ્રી ચાર્મી પારેખે પણ ભાગ લીધો હતો અને વિજેતા બનીને પ્રથમ સ્થાન મેળવ્યું હતું.
આ પ્રસંગે સુશ્રી ચાર્મીપારેખે તમામ વિજેતાઓની સાથે દાનહ ભારત સ્કાઉટ ગાઇડ શ્રુતિ મૌર્ય અને સેલવાસની રેણુકા ચૌધરીને પણ મેડલ પહેરાવીને પ્રોત્સાહિત કર્યા અને ભેટ આપી અભિનંદન પાઠવ્યા હતા. સુશ્રી ચાર્મી પારેખે જણાવ્યું હતું કે, છોકરીઓ અને મહિલાઓએ પોતાની ફિટનેસને ધ્યાનમાં રાખવી ખૂબ જ જરૂરી છે, તેમણે વધુમાં જણાવ્યું હતું કે, અધિકારીઓ આવે છે અને જાય છે, પરંતુ મેં મારા કાર્યકાળ દરમિયાન દમણથી શરૂ કરેલી શ્રેણીનો ચોથો તબક્કો હજુ પણ સમાજ કલ્યાણ વિભાગ દ્વારા આગળ ધપાવવામાં આવી રહ્યો છે અને તેમાં સહભાગીઓની સંખ્યા પણ વધીને 1000થી વધુ થઈ છે.
આ સફળ ‘ગો ગર્લ્સ નાઇટ રન ઇવેન્ટ’ માટે સમાજ કલ્યાણ વિભાગ દમણે તમામ આયોજકોનો આભાર માન્યો હતો.
