15 જેટલા ફાયર ફાયટરો કલાકો સુધી આગ બુઝાવવાની જહેમત ઉઠાવી : છાશવારે ભંગારના ગોડાઉનોમાં લાગતી આગ ચિંતાજનક
(વર્તમાન પ્રવાહ વાપી બ્યુરો)
વાપી, તા.14 : વાપી ડુંગરી ફળીયા વિસ્તાર એટલે ભંગાર ગોડાઉનોનો વિસ્તાર. સેંકડો ભંગારના ગોડાઉનો અહીં ધમધમી રહ્યા છે. આજે મંગળવારે મળસ્કે 3:30 કલાકના સુમારે અચાનક મળસ્કેજ અફરા તફરીનો માહોલ છવાઈ ગયો હતો. સ્થાનિક લોકોની જાણ બાદ નજીકના તમામ ફાયર બ્રિગેડમાં આગની જાણ કરાઈ હતી. તેથી આગની ભિષણતા નિરખાયા બાદ એક પછી એક 15 જેટલા ફાયર ફાયટરો ઘટના સ્થળે દોડી આવ્યા હતા.
વાપી ડુંગરી ફળીયામાં ભંગાર ગોડાઉનોની થપ્પી લાગેલી છે. તેમાં અનેક એવા ગોડાઉન પણ છે જેમાં જ્વલનશીલ પદાર્થોના ડ્રમ-કારબા, કોરૂરેગેટ બોક્ષ, પ્લાસ્ટીક વેસ્ટના ગંજ જમાયેલા રખાય છે. તેથી અવારનવાર ભંગારના ગોડાઉનો આગની લપેટમાં આવતા રહ્યા છે. આજે પણ એક સાથે એક પછી એક ગોડાઉનમાં આગ પ્રસરી ગઈ હતી. આજુબાજુમાં આવેલ રહેઠાણ વિસ્તારો હોવાથી સમગ્ર વિસ્તારમાં અફરા તફરી સાથે દોડધામ મચી જવા પામી હતી. લોકોમાં રીતસરનો ગભરાહટનોમાહોલ છવાઈ જવા પામેલ. આગ લાગવાનું કારણ જાણ શકાયું નથી, પણ ભંગારના ગોડાઉનોમાં છાશવારે લાગતી આગો વાપી માટે ચિંતાજનક હકિકત છે.
