બબાલ બાદ ધસી આવેલ પોલીસે મામલો થાળે પાડવાની હાથ ધરેલ કવાયત
(વર્તમાન પ્રવાહ વાપી બ્યુરો)
વાપી, તા.20: વાપી નજીક આવેલ બગવાડા ટોલનાકા ઉપર આજે સોમવારે ટોલ કર્મચારીઓ અને સ્થાનિક વાહન ચાલકો વચ્ચે વધુ ટોલ ઉઘરાવતા મામલો બીચકાયો હતો. ઉભી થયેલી બબાલમાં હાથાપાઈ પણ થઈ હોવાના અહેવાલ છે.
હાઈવે ઓથોરીટી દ્વારા બગવાડામાં કાર્યરત ટોલનાકા ઉપર અવાર નવાર કોઈના કોઈ બાબતે ઉગ્ર વિવાદો સર્જાતા રહે છે. આજે તેવો વધુ એક વિવાદ સર્જાયો હતો. સ્થાનિક ટેમ્પો ચાલક પાસે વધુ ટોલ વસુલવામાં આવતા સ્થાનિકવાહન ચાલકો ભેગા થઈ ગયા હતા. ટોલ કર્મચારીઓ સાથે મોટી બબાલ ઉભી થઈ હતી. મામલો હાથાપાઈ સુધી પહોંચી ગયાનું કહેવાય છે. પારડી પોલીસને ઘટનાની જાણ થતા બગવાડા ટોલનાકા ઉપર આવી પહોંચી મામલો સંભાળી લીધો હતો. તેમજ વાત વધુ વણશે નહીં તેથી મામલો થાળે પાડવાની કવાયત હાથ ધરી હતી. ઉલ્લેખનીય છે કે, બગવાડા ટોલનાકા ઉપર અવાર નવાર વાહન ચાલકો અને હાઈવે ઓથોરિટીના કર્મચારીઓ સાથે વિવાદો બનતા, ઉભા થતા રહ્યા છે.
