સંઘપ્રદેશ ભાજપ મહિલા મોર્ચા દ્વારા સેલવાસ ઝંડાચોક શાળાની આચાર્ય કુ. સુઝાન જીસસને રાષ્ટ્રધ્વજ આપી કરાયેલું સન્માન
(વર્તમાન પ્રવાહ ન્યુઝ નેટવર્ક)
સેલવાસ, તા.23: સેલવાસ ઝંડાચોક ખાતેની અંગ્રેજી પ્રાથમિક શાળાના આચાર્યા કુ. સુઝાન જીસસ વિશ્વના સૌથી ઊંચા પર્વત હિમાલયના માઉન્ટ એવરેસ્ટ સર કરવા માટે રવાના થયા છે. તેઓ માઉન્ટ એવરેસ્ટ ઉપર સર કરવા જનારા સંઘપ્રદેશના પ્રથમ મહિલા છે. આજે કેન્દ્ર શાસિત પ્રદેશ દાદરા નગર હવેલી અને દમણ-દીવ પ્રદેશ ભારતીય જનતા પાર્ટી મહિલા મોર્ચા દ્વારા કુ. સુઝાન જીસસને રાષ્ટ્રધ્વજ અને ફૂલોનો ગુલદસ્તો આપી અભિવાદન કરવામાં આવ્યું હતું અને તેમના માઉન્ટ એવરેસ્ટ સર કરી તિરંગો લહેરાવી દેશ અને પ્રદેશનું નામ રોશન કરે તે માટે આર્શીવાદ તથા શુભકામના પાઠવવામાં આવી હતી.
માઉન્ટ એવરેસ્ટ પરજવા માટે આચાર્ય કુ. સુઝાન જીસસ નવેમ્બર, 2022થી ફેબ્રુઆરી,2023 દરમિયાન ભારતના વિવિધ પર્વતો ઉપર ચડવાની તાલીમ પણ લઈ ચુક્યા છે. થોડા દિવસ અગાઉ એમને ‘સુષ્મા સ્વરાજ’ એવોર્ડથી સન્માનિત પણ કરવામાં આવ્યા હતા.
અભિવાદન સમારંભ દરમિયાન દાનહ અને દમણ-દીવ પ્રદેશ મહિલા મોર્ચાના મહામંત્રી શ્રીમતી પુષ્પાબેન પટેલ, ઉપ પ્રમુખ શ્રીમતી પ્રીતિબેન દોડીયા, મંત્રી શ્રીમતી છાયાબેન પટેલ, જિલ્લા ભાજપ પ્રમુખ શ્રીમતી સુનંદાબેન કચવે, જિલ્લા મહામંત્રી ક્રિના પાઠક, શહેર ભાજપ પ્રમુખ શ્રીમતી હેમલતા ચૌહાણ વગેરે ઉપસ્થિત રહ્યા હતા.
