સેલવાસ દત્તકગ્રહણ સંસ્‍થા ખાતે કલેક્‍ટરના હસ્‍તે બાળકને દત્તક આપવાની પૂર્ણ થયેલી વિધિ

હવે, બાળકને દત્તક લેવાની પારદર્શક અને સરળ બનેલી પ્રક્રિયા

(વર્તમાન પ્રવાહ ન્‍યુઝ નેટવર્ક)
સેલવાસ, તા.13: દાદરા નગર હવેલી અને દમણ-દીવના મહિલા અને બાળ વિકાસ વિભાગ હેઠળ વિશિષ્ટ દત્તક ગ્રહણ સંસ્‍થા ઝંડા ચોક, સેલવાસ ખાતે કાર્યરત છે. આ સંસ્‍થા કોઈપણ માતા-પિતા દ્વારા સમર્પિત કરેલું બાળક ત્‍યજી દેવાયેલ બાળક અથવા કોઈપણ બાળક જેનું કોઈ ન હોય અને તેની ઉંમર 0 થી 6 વર્ષ હોય તો તેને આ સંસ્‍થામા મુકવામાં આવે છે.
આ સંસ્‍થામાં કલેક્‍ટર અને સચિવ શ્રીમતી ભાનુ પ્રભા અને ઉપસચિવ શ્રી મનોજ પાંડેના માર્ગદર્શન હેઠળ વિશિષ્ટ દત્તક સંસ્‍થાના આશ્રિત બાળકને એડોપ્‍સન રેગ્‍યુલેશન-2022 હેઠળ અન્‍ય રાજ્‍યના રહેવાસી માતા-પિતાને કલેકટર શ્રીમતી ભાનુ પ્રભાના હસ્‍તે દત્તક આપવામાં આવેલ છે. સેલવાસના દત્તક ગ્રહણ સંસ્‍થા દ્વારા અત્‍યાર સુધીમા 12 બાળકોને દત્તક આપવામાં આવેલ છે.
બાળક દત્તક લેવાની પ્રક્રિયા વિશેની માહિતીના અભાવના કારણે લોકો બાળક દત્તક લેવાથી વંચિત રહી જાય છે. જેથી જાહેર જનતાનેઅનુરોધ છે કે બાળક દત્તક લેવા માટે www.cara.nic.in સેન્‍ટ્રલ એડોપ્‍સન રિસોર્સ ઓથોરિટી પર ઓનલાઈન નોંધણી કરાવવી જરૂરી છે, જેના કારણે બાળક દત્તક લેવું પારદર્શક અને સરળ બન્‍યું છે. હવે માતા-પિતાને બાળક દત્તક લેવાના રજીસ્‍ટ્રેશન માટે અન્‍ય રાજ્‍યમાં જવાની જરૂર નથી.