(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.30: ચીખલી તાલુકામાં સતત બીજા દિવસે કમોસમી વરસાદ વરસ્યો હતો. જોકે વરસાદ બાદ વાતાવરણ ખુલ્લુ થતાં તડકો જોવા મળ્યો હતો.
હવામાન વિભાગની આગાહી વચ્ચે આજે બીજા દિવસે પણ ચીખલી તાલુકામાં વાદળો ઘેરાયા હતા અને સવારે દસેકવાગ્યાના અરસામાં કડાકા ભડાકા સાથે વરસાદ શરૂ થયો હતો. સતત 15 થી 20 મિનિટ ધીમી ધારે વરસાદ વરસતા માર્ગો પરથી પાણી વહેવા સાથે ખાડા ખાબોચીયા પણ પાણીથી છલકાઈ ગયા હતા. વરસાદ બાદ કાળા દીબાંગ વાદળો દૂર થઈ જતા વાતાવરણ સાફ થઈ જતા તડકો પડ્યો હતો.
હાલે ચીખલી તાલુકામાં આંબા પરથી કેરી ઉતારવાનું કામ ચાલતું હોય આ કામમાં પણ મુશ્કેલી સર્જાઈ હતી. આ ઉપરાંત ઈંટ ઉત્પાદનના ભથ્થાઓ પર માટેની કાચી ઈંટો પર પ્લાસ્ટિક ઓઢાડી કાચી ઈંટને સુરક્ષિત કરવા માટે ભથ્થાના માલિકોને મથામણ કરવી પડી હતી. આ ઉપરાંત રવિવાર હોય ગામે ગામ નાની મોટી ચાલતી ક્રિકેટ ટૂર્નામેન્ટોના રંગમાં પણ વરસાદની એન્ટ્રીથી ભંગ પડ્યો હતો. તાલુકામાં સુજલામ સુફલામ કે અન્ય રીતે માટી ખનન કરતાં વાહનોને પણ બ્રેક લાગી ગઈ હતી. હાલે લગ્નની સીઝન પણ આવી રહી છે. તેવા સંજોગોમાં કમોસમી વરસાદથી લગ્ન આયોજકોની મૂંઝવણ પણ વધવા પામી છે.
