(વર્તમાન પ્રવાહ ન્યુઝ નેટવર્ક)
સરીગામ, તા.07: ઉમરગામતાલુકાની સોળસુંબા ગ્રામ પંચાયતનો વિવાદિત વહીવટ ચર્ચાના કેન્દ્ર સ્થાને છે. ગ્રામસભા કે સામાન્ય સભામાં ગ્રામજનો અને ચૂંટાયેલા સભ્યો વહીવટ સામે બાયો ચડાવતા જોવા મળી રહ્યા છે. આ મધ્યાંતરે વધુ એક ઘટના પ્રકાશમાં આવી છે. સોળસુંબા માહ્યાવંશી વિસ્તારમાં કાર્યરત આંગણવાડી બાળકો માટે અસલામત હોવાનું જાણવા મળી રહ્યું છે. આંગણવાડી મકાનનું કલર કામ કરવામાં આવ્યું છે પરંતુ તૂટેલા બારી બારણાને રીપેર કરવામાં આવ્યા નથી.
આ ઉપરાંત આંગણવાડીને અડીને માર્ગ પસાર થયેલો છે જેના ઉપરથી ભારેખમ વાહનોની સતત અવરજવર જોવા મળે છે. જેના કારણે આંગણવાડીના ફરતે કમ્પાઉન્ડ વોલ બનાવવાની જરૂર છે. આથી વધુ પંચાયતના વહીવટ સાથે સંકળાયેલા વ્યક્તિએ આંગણવાડીના મેદાનમાં ભારેખમ વાહનોની પાર્કિંગ વ્યવસ્થા પણ ગેરકાયદેસર ઉભી કરી હોવાની માહિતી પ્રાપ્ત થઈ રહી છે. આ તમામ પ્રવૃત્તિ અને આંગણવાડીનું મકાન જોતા અહીં અભ્યાસ માટે આવતા તમામ બાળકો અસુરક્ષિત હોવાનું પ્રથમ નજરે જણાવી રહ્યું છે. આ સમસ્યાનું નિવારણ માટે આંગણવાડી સંચાલકોએ સોળસુંબા ગ્રામ પંચાયતનું મૌખિક અને લેખિત ધ્યાન દોર્યું છે, પરંતુ સમસ્યાનું નિવારણ આવી શકયું નથી. જેના ઉપર જવાબદાર વિભાગે ધ્યાન આપવાનીજરૂરિયાત જણાઈ રહી છે.
