આંતરિક તાલુકાની પોલીસ ચેકીંગ કામગીરી કરશે : રાજ્યભરમાં અભિયાન
(વર્તમાન પ્રવાહ વાપી બ્યુરો)
વાપી, તા.25: અમદાવાદમાં એસ.જી. હાઈવે ઉપર રફ ડ્રાઈવિંગને કારણે અમીર બાપની ઓલાદ તથ્ય પટેલએ ફુલ ઝડપે કાર ચલાવીને 9 નિર્દોષની જીંદગી છીનવી લીધી. કેટલાય પરિવારો વિંખાઈ ગયાની બનેલી જધન્ય ઘટના બાદ સમગ્ર રાજ્યની પોલીસ એકશનમાં આવી ગઈ છે. રાજ્યભર પોલીસ દ્વારા એક મહિના સુધી મેગા ડ્રાઈવનો અમલ જારી કરી દેવાયો છે તે મુજબ વાપી સહિત વલસાડ જિલ્લામાં પોલીસ કટીબધ્ધ રીતે હાઈવે સહિત વિવિધ રોડો ઉપર ઘનિષ્ઠ વાહન ચેકિંગ ઝુંબેશ ચલાવાશે.
રાજ્યના મુખ્ય પોલીસ વડા વિકાસ સહાય, લો એન્ડ ઓર્ડર વડાનરસિંહમાં કોમાર અને આઈ.બી. વડા અનુપમ સિંહ દ્વારા રાજ્યભરના પોલીસ અધિકારીઓને મેગા ડ્રાઈવનો આદેશ ફાળવી દેવાયો છે. ઓવરસ્પિડ ડ્રાઈવ, સ્ટંટબાજોને વીણી વીણી લોકઅપ ભેગા કરાશે તેમજ વાહનો પોલીસ સ્ટેશને જપ્ત કરી લેવાશે. બીજુ વધુ કડકાઈભર્યા નિર્ણય એ લેવાયો છે કે આંતરિક તાલુકાની પોલીસ અભિયાનમાં જોડાશે. તેથી વાપી સહિત વલસાડ જિલ્લામાં આજથી અમલવારી શરૂ થઈ ચૂકી છે.