(વર્તમાન પ્રવાહ ન્યુઝ નેટવર્ક)
પારડી,તા.15: પારડીના કીકરલા ગામે નાની કોળીવાડ ખાતે રહેતા અશોક પરાગભાઈ કો. પટેલનો છોટા હાથી ટેમ્પો નં.જીજે-15-એટી-5061 ગત તા.11-10-23 ના રોજ તેમણે પોતાના ઘર આંગણામાં લોક કરી પાર્ક કર્યો હતો. આ દરમિયાન રાત્રિના કોઈ ચોર ઈસમ આ ટેમ્પાનું લોક તોડી અથવા ડુપ્લીકેટ ચાવી વડે ખોલી ટેમ્પાની ચોરી કરી ફરાર થઈ ગયો હતો. જે અંગેની તેમણે પારડી પોલીસ મથકે ફરિયાદ નોંધાવતા પારડી પોલીસે ચોરને ઝડપવા કાર્યવાહી હાથ ધરી હતી. આ દરમિયાન આ ચોરેલો ટેમ્પો લઈ લઈ ફરતા મકસૂદ અબ્દુલ હમીદ શેખ ઉ.વ.45 રહે.વલસાડ ધરમપુર, વડ ફળિયા મિનારા મસ્જિદ પાસે અને કમલેશ ગાગુલાજી પ્રજપતિ ઉ.વ.30 રાજસ્થાન, ઉદયપુર, સંદેસરા છોટાઉદેપુર એલસીબી પોલીસના હાથે વાહન ચેકિંગમાં ઝડપાઈ જતાં તેમણે પારડી પોલીસને જાણ કરવામાં આવતા પારડી પોલીસ છોટાઉદેપુર પહોંચી ટેમ્પો સાથે બંને આરોપીને લઈ આવી કાર્યવાહી હાથ ધરી છે. ત્યારે વધુ તપાસમાં આ બન્ને રીઢા ચોર હોવાનું બહાર આવ્યું છે.
