(વર્તમાન પ્રવાહ ન્યુઝ નેટવર્ક)
સેલવાસ, તા.22 : સેલવાસની કેટલીક અલગ અલગ ઈલેક્ટ્રોનિક દુકાનોમાં સામાન ખરીદીના બહાને ચેક આપી છેતરપિંડીની ઘટના અંગે પોલીસ સ્ટેશનમાં અલગ અલગ વેપારીઓ દ્વારા ફરિયાદ નોંધાવવામાં આવી છે.
પ્રાપ્ત વિગત અનુસાર સેલવાસ પોલીસ સ્ટેશનની સામે જ આવેલ શોપિંગ સેન્ટરમાં શ્રી ગણેશ ઈલેક્ટ્રિકલ દુકાનમાં ગત દિવસોમાં કેટલાક ઠગો દ્વારા દુકાન મલિક સતીષ રાઠોડને મોટી મોટી વાતોમાં ફસાવી અંદાજીત 80 હજાર રૂપિયાના ઈલેક્ટ્રોનિક સમાનની ખરીદી કરીને સામે મહેશ મુરલીધર પવાર નામની સિગ્નેચર કરેલ ચેક આપી છેતરપિંડી કરી હોવાનું જણાવાયું છે.
દુકાનદારના જણાવ્યા અનુસાર છેતરપિંડી કરનાર એમની દુકાન પર આવી અને એમને ઘણો બધો સામાન કાઢવા માટે કહેલ અને આગળ પણ મોટો ઓર્ડર આપવાની વાત કરી હતી. દુકાનદાર લાલચમાં આવી અને વિશ્વાસ કરતા એક ચેક લઈ હજારોનો સામાન તેઓને આપ્યો હતો. ત્યારબાદ દુકાનદારે બેંકમાં ચેક જમા કરતા ચેક બાઉન્સ થયો હતો ત્યારે એમને ખબર પડી કે એમની સાથે છેતરપિંડી થઈ છે. ત્યારબાદ તેઓ પોલીસના શરણે ગયા હતા, ત્યાં જોયું તો એમની સાથે બીજા વેપારીઓ પણ છેતરપિંડીના ભોગ બનેલા જોવા મળ્યા હતા. જેમાં એક વિનાયક ઈલેક્ટ્રોનિક્સદુકાનમાંથી રૂા. 90 હજારનો સામાન લઈ ગયેલ હોવાનું જાણવા મળ્યું હતું. આવી જ રીતે અન્ય બીજી કેટલીક દુકાનોમાંથી પણ ઠગો દ્વારા છેતરપિંડી કરાઈ હોવાની ઘટના સામે આવી હતી. છેતરપિંડી કરનાર ઠગબાજ વ્યક્તિઓ સી.સી.ટી.વી. કેમેરામાં કેદ થયેલા હોવાનું જોવા મળી રહ્યા છે.
ઘટના બાબતે સેલવાસ પોલીસે ફરિયાદ નોંધી સીસીટીવી ફુટેજ અને બેંક ડિટેઈલના આધારે આગળની વધુ તપાસ હાથ ધરી છે.
