કપરાડા કુંભઘાટ અકસ્માત ઝોન બની ગયો છે : વારંવાર ટ્રકો પલટી મારી જતા નિર્દોષના જીવ લેવાઈ રહ્યા છે
(વર્તમાન પ્રવાહ વાપી બ્યુરો)
વાપી, તા.20: કપરાડા નજીક કુંભઘાટ નાસિક રોડ ઉપર ઘાટમાં બ્રેક ફેઈલ થઈ જતા લોકંડના સળીયા ભરેલી ટ્રક પલટી મારી ગઈ હતી. સર્જાયેલ ગંભીર અકસ્માતમાં ડ્રાઈવર-ક્લિનર ટ્રકમાં ફસાયા હતા. સ્થાનિકોએ કેબિન તોડી બન્નેનું રેસ્ક્યુ કર્યું હતું.
કપરાડા કુંભઘાટ જોખમી પર્વતિય ઢોળાવો વાળો રોડ હોવાથી સપ્તાહમાં એક-બે વાહનો પલટી મારી જવાની ઘટનાઓ નિરંતર બની રહી છે તેવીવધુ એક ઘટના આજે બુધવારે નાસિક રોડ કુંભઘાટ ઉપરથી ઉતરતી લોકંડના સળીયા ભરેલ ટ્રકની બ્રેક સિસ્ટમ ફેઈલ થઈ ગઈ હતી. ડ્રાઈવરે સમય સુચકતા વાપરીને ટ્રકને રોડની એક સાઈડ અથડાવી હતી. જેમાં ટ્રક પલટી મારી ગઈ હતી. અલબત્ત અકસ્માતમાં ટ્રકની કેબિનમાં ડ્રાઈવર-ક્લિનર ખરાબ રીતે ફસાઈ ગયા હતા. ઘટના સમયે ઉપસ્થિત રહેલા સ્થાનિકોએ કેબિન તોડી કાચ ફોડીને અંદર ફસાયેલા ડ્રાઈવર-ક્લિનરને રેસ્ક્યુ કરી બચાવી લીધા હતા. તેમજ સારવાર માટે મોકલી આપ્યા હતા. ઉલ્લેખનીય છે કે, કુંભઘાટ – કુંભઘાટ મટી અકસ્માત ઘાટ બની રહેલ હોવાથી વાહનોની પલટી મારી જતી ઘટનાઓમાં ક્યારેક નિર્દોષ મરી રહ્યા છે.
