મરવડ ગ્રામ પંચાયતના સેક્રેટરીએ કરેલી લેખિત ફરિયાદ
(વર્તમાન પ્રવાહ ન્યુઝ નેટવર્ક)
દમણ, તા.01 : દમણ જિલ્લામાં પ્રોપર્ટી સર્વેનું કામ કરી રહેલ મેસર્સ સી.ઈ.ઈન્ફો સિસ્ટમ લિમિટેડ(મેપ માય ઈન્ડિયા નવી દિલ્હી)ના સર્વેનું કામ કરતા એક કર્મચારીએ મરવડ ગ્રામ પંચાયતમાં લોકોને જુઠ્ઠું બોલી સર્વે કરવા અને ઘર નંબર અલગ કરવા માટે રૂા.1000ની માંગણી કરતાં પોલીસ ફરિયાદ નોંધાઈ છે.
પ્રાપ્ત માહિતી પ્રમાણે દમણ જિલ્લા પંચાયત દ્વારા સમગ્ર દમણ જિલ્લામાં પ્રોપર્ટી સર્વેનું કામ મેસર્સ સી.ઈ.ઈન્ફો સિસ્ટમ લિમિટેડ(મેપ માય ઈન્ડિયા નવી દિલ્હી)ને સોંપવામાં આવેલ છે. સર્વે કરતા કર્મી પૈકીનો એક વ્યક્તિ અવિનાશ વેદપ્રકાશ તિવારી રહે.651/1850, બીનગાંવ, કે.ડી.એ.કોલોની કાનપુર-ઉત્તર પ્રદેશનાએ મરવડ ગ્રામ પંચાયતવિસ્તારમાં લોકો સામુ જુઠ્ઠું બોલી સર્વે કરવા અને ઘર નંબર અલગ કરવા માટે રૂા.1000ની માંગણી કરી રહ્યા હોવાનું મરવડ ગ્રામ પંચાયતના સેક્રેટરીની જાણકારીમાં આવ્યું હતું. સરકાર દ્વારા કોઈપણ પ્રકારની ફી નિર્ધારિત કરવામાં આવેલ નહીં હોવા છતાં લોકો સાથે છેતરપિંડીથી પૈસા માંગવાના સંબંધમાં મરવડ ગ્રામ પંચાયતના સેક્રેટરીએ આપેલી લેખિત ફરિયાદના અનુસંધાનમાં કોસ્ટલ પોલીસ સ્ટેશન કડૈયા-નાની દમણે આઈ.પી.સી.ની 420 કલમ અંતર્ગત ગુનો નોંધી આરોપી અવિનાશ વેદપ્રકાશ તિવારી વિરૂદ્ધ કાનૂની કાર્યવાહી શરૂ કરી છે.
