34 વર્ષની પોતાની સુદીર્ઘ સેવા દરમિયાન અનેક પડકારજનક કામો કરી વિભાગની વધારેલી શાખઃ તોફાને ચઢેલા એક બળદ(સાંઢ)ને કાબુમાં લેવા બતાવેલા પરાક્રમ અને કૌવત બદલ સંઘપ્રદેશ પ્રશાસન દ્વારા દિનેશભાઈ માહ્યાવંશીને પુરસ્કૃત પણ કરાયા હતા
(વર્તમાન પ્રવાહ ન્યુઝ નેટવર્ક)
દમણ, તા.01 : દમણ અને દીવ વન વિભાગમાં ફોરેસ્ટ ગાર્ડ તરીકે 34 વર્ષ સુધી સુદીર્ઘ સેવા બજાવી વયમર્યાદાના કારણે નિવૃત્ત થતાં શ્રી દિનેશભાઈ બી. માહ્યાવંશીને વિદાયમાન સન્માન આપવામાં આવ્યું હતું.પોતાની ફોરેસ્ટ ગાર્ડ તરીકેની જવાબદારી દરમિયાન શ્રી દિનેશભાઈ માહ્યાવંશીએ અનેક કપરી ફરજો પણ નિભાવી હતી. જેમાં એક તોફાને ચઢેલા બળદ(સાંઢ)ને નાથવા પોતાનું પરાક્રમ અને કૌવત બતાવી તમામને દંગ કરી દીધાં હતા. પોતાના જાનની બાજી લગાવી તોફાને ચઢેલા બળદ(સાંઢ)ને કાબૂમાં લાવવા બદલ પ્રશાસને શ્રી દિનેશભાઈ બી. માહ્યાવંશીને પ્રશસ્તિ પત્ર આપી સન્માનિત પણ કર્યા હતા.
શ્રી દિનેશભાઈ માહ્યાવંશીને નિવૃત્તિ વિદાયમાન દરમિયાન નાયબ વન સંરક્ષક શ્રી રાજ તિલક અને સહાયક વન સંરક્ષક (વાઈલ્ડ લાઈફ દાનહ) શ્રી ગાયકવાડે ખાસ ઉપસ્થિત રહી તેમની સેવાને બિરદાવી હતી અને તંદુરસ્ત સુખી જીવનની કામના પણ કરી હતી.
