તાલુકાના અનુસૂચિત જનજાતિ વર્ગની 218 ટીમે લીધેલો ભાગ, જેમાં ગુરુકળપા કનાડુ અને મોહન ગામ ઈલેવન વચ્ચે થયેલા ફાઈનલ મુકાબલામાં ગુરુકૃપા કનાડુ ટીમ ચેમ્પિયન
(વર્તમાન પ્રવાહ ન્યુઝ નેટવર્ક)
સરીગામ, તા.08: ઉમરગામ તાલુકાના માંડા પલાટપાડા ખાતે સ્વ.સતુભાઈ ઠાકરીયાના સ્મર્ણાર્થે એમના પરિવાર દ્વારા અનુસૂચિત જનજાતિ વર્ગના યુવાનોમાં ભાઈચારા અને એકતાની ભાવના જળવાઈ રહે એવા ઉદ્દેશ સાથે ટેનિસ ક્રિકેટ ટુર્નામેન્ટનું આયોજન કરવામાં આવ્યું હતું. સતતપાંચ દિવસ સુધી ચાલેલી ટુર્નામેન્ટમાં તાલુકાની 218 ટીમોએ ઉત્સાહપૂર્વક ભાગ લઈ પ્રદર્શન કર્યું હતું. યુવાનોએ ટુર્નામેન્ટ દરમિયાન બતાવેલી સ્પોર્ટ્સમેનશિપ અને સંચાલક શ્રી દિલીપભાઈ ઠાકરીયા, શ્રી પ્રભુભાઈ ઠાકરીયા અને એમના પરિવારે ગોઠવેલી વ્યવસ્થા પ્રસન્નીય રહી હતી. આધુનિક ટેકનોલોજીનો ઉપયોગ કરી યુટયુબના માધ્યમથી જીવંત પ્રસારણ કર્યું હતું. વિજેતા ટીમ તેમજ ઉપવિજેતા ટીમોને રોકડ પુરસ્કાર તેમજ ટ્રોફી આપી પ્રોત્સાહિત કરવામાં આવ્યા હતા.
આ ટુર્નામેન્ટનો પ્રારંભ ધારાસભ્ય શ્રી રમણભાઈ પાટકરના હસ્તે કરવામાં આવ્યો હતો. ધારાસભ્ય શ્રી રમણભાઈ પાટકરે આ પ્રસંગે સ્વ.સતુભાઈ ઠાકરીયાએ જન્મભૂમિ પ્રત્યે અદા કરેલી નિષ્ઠાવાન ફરજો અને અહમ ભૂમિકા ઉપર પ્રકાશ પાડી દિલથી યાદ કરી શ્રદ્ધાંજલિ આપી હતી. આ કાર્યક્રમમાં એસઆઈએ પ્રેસિડેન્ટ શ્રી કમલેશભાઈ ભટ્ટ, સેક્રેટરી શ્રી હેમંતભાઈ મંડોલી, ઉદ્યોગપતિ શ્રી નિર્મલભાઈ દુધાની શ્રી સમીમભાઈ રિઝવી સહિતના ઉદ્યોગપતિ તેમજ રાજકીય આગેવાન ભાજપ તાલુકા સંગઠન પ્રમુખ શ્રી દિલીપભાઈ ભંડારી, માજી ધારાસભ્ય શ્રી શંકરભાઈ વારલી, જિલ્લા પંચાયતના સભ્યશ્રી દીપકભાઈ મિષાી, શ્રી રાકેશભાઈ રાય, શ્રી પ્રતિકભાઈ રાય સહિત મોટી સંખ્યામાં આગેવાનો હાજર રહી યુવાનોને પ્રોત્સાહન પૂરું પાડ્યુંહતું.
