સમયસર પાલિકા ફાયરની ટીમે કચરાના ઢગલામાં લાગેલી આગ બુઝાવી દેતા મોટું નુકશાની ટળી હતી
(વર્તમાન પ્રવાહ વાપી બ્યુરો)
વાપી, તા.19: વલસાડ સિટી પોલીસ સ્ટેશન પાછળ રહેલ કચરાના ઢગલામાં આજે સોમવારે સવારે અચાનક આગ લાગી હતી. આગમાં મુદ્દામાલતરીકે પાછળ રાખેલા વાહનો પૈકી બે બાઈક બળીને ખાખ થઈ ગયા હતા.
વલસાડ સિટી પોલીસ સ્ટેશનના પાછળના ભાગે ગુનાના કામે પગડાયેલ વાહનો રાખવામાં આવે છે. આ સ્થળે બાજુમાં મોટો કચરાનો ઢગલો પણ આવેલો છે. આ ઢગલામાં આજે સવારે અચાનક આગ ભભુકી ઉઠી હતી. પોલીસ કર્મચારીઓ દોડી ગયા હતા. તુરત વલસાડ નગરપાલિકા ફાયર બ્રિગેડની જાણ કરવામાં આવી હતી. ફાયરની ટીમ ઘટના સ્થળે દોડી આવી હતી. ઝડપભેર પાણીનો મારો ચલાવી જેહમત ઉઠાવી આગ ઉપર કાબુ મેળવી લીધો હતો. જો કે આગ ઝડપથી બુઝાઈ જતા મોટી નુકશાની ટળી હતી. કારણ કે આ સ્થળે ગુનામાં પકડાયેલા ટુવ્હિલરો રાખવામાં આવે છે. આગમાં બે ટુવ્હિલર બળીને ખાખ થઈ ગયા હતા.
