આપસી દુશ્મનીમાં થયેલી હત્યાઃ બે આરોપીઓની ધરપકડ
(વર્તમાન પ્રવાહ ન્યુઝ નેટવર્ક)
દમણ, તા.12 : દમણ પોલીસે નાની દમણ બસ સ્ટેન્ડ ખાતે એક અજાણ્યા વ્યક્તિની થયેલી હત્યાનો ભેદ માત્ર 72 કલાકમાં ઉકેલી બે આરોપીઓની ધરપકડ પણ કરી છે.
પ્રાપ્ત માહિતી પ્રમાણે ગત તા.7મી ડિસેમ્બરે નાની દમણ બસ સ્ટેન્ડ પાસે રાત્રે 11:10 કલાકે એક અજાણ્યો વ્યક્તિ બેભાન હાલતમાં પડેલ હોવાનું જાણકારી પોલીસને મળતાં તાત્કાલિક ઘટના સ્થળે પહોંચી અજાણ્યા વ્યક્તિને મરવડ હોસ્પિટલ લઈ જવાયો હતો. જ્યાં ઉપસ્થિત ડોક્ટરે મૃત જાહેર કર્યો હતો. પ્રારંભિક તપાસમાં મૃતકનું મોત કોઈ ધારદાર ચાકુથી શરીર ઉપર ઘા કરતા થયું હોવાનું દેખાતા નાની દમણ પોલીસ સ્ટેશનમાં આઈપીસીની 302 કલમ અંતર્ગત ગુનો નોંધવામાં આવ્યો હતો.
સંઘપ્રદેશના ડીઆઈજી શ્રી મિલિંદ મહાદેવ ડુમ્બેરેના માર્ગદર્શન અને દિશા-નિર્દેશ હેઠળ એસ.પી.ની પહેલથી ગુનાની તપાસ માટે અલગ અલગ ટીમ બનાવી સંયુક્ત રીતે તપાસ જારી રાખી હતી. જેમાં મૃતકનું મોત આપસી દુશ્મનીમાં થયુંહોવાનું બહાર આવ્યું હતું અને મૃતકની ઓળખ ઈરફાન ગુલામ હુસેન શેખ (ઉ.વ.35) હાલ બસ સ્ટેન્ડના ફૂટપાથ ઉપર અને મૂળ નિવાસી નાનપુરા સુરત તરીકે થવા પામી હતી. મૃતકની હત્યા ભગવાન ફકીરભાઈ ટંડેલ (ઉ.વ.45) રહે. કાપડિયા હોસ્પિટલની સામે ખારીવાડ નાની દમણ અને વિરેન્દ્ર ફકીરભાઈ ટંડેલ (ઉ.વ.37) રહે. ચિનિયા શેરી નાની દમણનાએ કરેલ હોવાનું જણાતા બંને આરોપીઓની ધરપકડ કરવામાં આવી છે.
