(વર્તમાન પ્રવાહ વાપી બ્યુરો)
વાપી, તા.26: વાપી સહિત વલસાડ જિલ્લામાં હોળી-ધુળેટી પર્વની હર્ષોલ્લાસ સાથે લોકોએ મન ભરી ઉજવણી કરી હતી. શનિ-રવિ-સોમની ત્રણ દિવસની રજાઓ રાખી લોકોએ હોળી પર્વની ઉજવણી કરી હતી.
ભારતવર્ષમાં હોળીનો મહિમા અપરંપાર છે. દેશના તમામ રાજ્યોમાં હોળીની ઉજવણી એટલે રંગોની ઉજવણી લોકો આનંદ સાથે કરવાની પરંપરા યથાવત છે. એ અનુસાર વાપી અને વલસાડ જિલ્લામાં હોળી પર્વની ઉજવણી કરવામાં આવી હતી. વાપીમાં મોટાભાગની શેરીઓ અને સોસાયટીઓમાં હોળીનું પ્રાગટય કરવામાં આવ્યું હતું. ભાવિકોએ હોળી દર્શન સાથે પૂજા-અર્ચના કરી હોળીની પ્રદક્ષિણાઓ કરી હતી. હોળીનો તહેવાર રંગો અને આનંદનો તહેવાર હોવાથી બીજા દિવસે સમગ્ર શહેરની દુકાનો, બજારો બંધ રહેતા અને ધુળેટીનો તહેવાર ઉજવી એકબીજાને અબીલ-ગુલાલ રંગોના રંગમાં સૌ કોઈ રંગાઈ ગયા હતા. ખાસ કરીને નવયુવાનો અને બાળકો મન મુકીને ધુળેટીના રંગ એકબીજાને છાંટી પર્વની શાનદાર ઉજવણી કરી હતી. આમ તો હોળીની ઉજવણી રાજસ્થાન પરિવારો માટે મોટો મહિમાવંતુ પર્વ છે. તેથી રાજસ્થાની પરિવારોએ અલગ અલગ જગ્યાએ ફાગોત્સવના પણ આયોજનો કર્યા હતા.
