(વર્તમાન પ્રવાહ ન્યુઝ નેટવર્ક)
સેલવાસ, તા.31 : દાદરા નગર હવેલીના રખોલી ગામ ખાતે રહેતા પરપ્રાંતિય પરિવારની એક કિશોરીએ કોઈક અગમ્ય કારણોસર પોતાના હાથની નસ કાપી જીવન ટૂંકાવ્યું હોવાની ઘટના પ્રકાશમાં આવી છે.
પ્રાપ્ત માહિતીપ્રમાણે રિયા સિંગ (ઉ.વ.17) રહેવાસી મહેશભાઈની ચાલ, રખોલી. મુળ રહેવાસી-ગોપાલગંજ બિહાર. તેણી રખોલી ખાતે માતા-પિતા અને ભાઈ સાથે રહે છે. માતા-પિતા અને ભાઈ સવારે રખોલી બજારમાં શાકભાજીનો ધંધો કરે છે ત્યાં ગયાં હતા, ત્યારબાદ બપોરે એના પિતા પીવાનું પાણી લેવા માટે ઘરે આવ્યા ત્યારે જોયું તો ઘરનો દરવાજો અંદરથી બંધ હતો, જેથી એમણે એમની દીકરીને બૂમ મારી પણ કોઈ જ જવાબ નહીં મળતા પાડોશીના ઘરના પાછળના ભાગેથી જઈને જોયું તો પાછળનો દરવાજો ખુલ્લો હતો જેમાંથી તેઓ ઘરમાં પ્રવેશ્યા હતા અને જોયું તો એમની દીકરી મૃત અવસ્થામાં પથારી પર પડેલી હતી. હેબતાઈ ગયેલા કિશોરીના પિતાએ એમના સાળાને અને ત્યારબાદ પોલીસને જાણ કરી હતી. સાયલી પોલીસની ટીમ તાત્કાલિક ઘટના સ્થળે દોડી આવી હતી અને કિશોરીની લાશનો કબ્જો લઈ પોસ્ટમોર્ટમ(પી.એમ.) માટે સિવિલ હોસ્પિટલમાં લઈ ગયા હતા. આ ઘટના અંગેની ફરિયાદ નોંધી વધુ તપાસ સાયલી પોલીસ કરી રહી છે.
