પાંચ રાજ્યોની વિધાનસભાની ચૂંટણી સાથે દેશની ખાલી પડેલ લોકસભાની બેઠકો માટે પણ પેટા ચૂંટણી યોજવા માટેનો ઘડાતો તખ્તો
(વર્તમાન પ્રવાહ ન્યુઝ નેટવર્ક)
દમણ, તા. ૦૫ઃ ભારતના ચૂંટણી પંચ દ્વારા પશ્ચિમબંગાળમાં વિધાનસભાની ખાલી પડેલી બેઠકો ઉપર પેટા ચૂંટણીની તારીખ ૩૦મી સપ્ટેમ્બર ઘોષિત કરવામાં આવી છે અને ચૂંટણી પંચે દેશના બીજા રાજ્યોમાં ખાલી પડેલ વિધાનસભા અને લોકસભાની ત્રણ બેઠકોની પેટા ચૂંટણી માટે કોરોના મહામારીના કારણે નિર્ણય નહીં લીધો હોવાનું પણ જણાવાયું છે.
ચૂંટણી પંચ દ્વારા દેશના વિવિધ રાજ્યોમાં ખાલી પડેલ વિધાનસભા અને દાદરા નગર હવેલી સહિત લોકસભાની પેટા ચૂંટણી માટે અત્યારે નિર્ણય નહીં લેતાં હવે ગોવા, મણિપુર, પંજાબ, ઉત્તરપ્રદેશ અને ઉત્તરાખંડ રાજ્યોની વિધાનસભા સાથે ૨૦૨૨ના આરંભમાં થવાની સંભાવના છે. તેથી દાદરા નગર હવેલી લોકસભા બેઠકની પેટા ચૂંટણી પણ ૨૦૨૨ના જાન્યુઆરી/ ફેબ્રુઆરીમાં યોજાવાની શક્યતા દેખાઈ રહી છે.
