કોન્ટ્રાક્ટરોનેગુરૂવારે રિવ્યુ બેઠકમાં બોલાવીને પાલિકાના નવા સુકાનીઓએ કાર્યરત વિકાસ કામોને રિવ્યુ લીધો
(વર્તમાન પ્રવાહ વાપી બ્યુરો)
વાપી, તા.24
વાપી નગરપાલિકા સભાખંડમાં હવેથી પ્રત્યેક ગુરૂવારે વિકાસ કાર્યો અંગે રિવ્યુ બેઠક યોજાશે તેવી નવી પહેલ પાલિકાના નવા સુકાનીઓએ આરંભી દીધી છે. વિકાસ કાર્યો કરતા કોન્ટ્રાક્ટરોને બોલાવાયા હતા અને કામની પ્રગતિ, મુશ્કેલી, કેટલા દિવસે કામ પુરુ થશે તેની રિવ્યુ બેઠકમાં વિશદ ચર્ચા કરવામાં આવી હતી.
વાપી નગરપાલિકા સભાખંડમાં નવા પ્રમુખ કાશ્મિરાબેન શાહ, ઉપપ્રમુખ અભય શાહ, કારોબારી ચેરમેન મિતેશ દેસાઈ, ચીફ ઓફિસર શૈલેષ પટેલ સહિત અન્ય અધિકારીઓની ગુરૂવારે રિવ્યુ બેઠક યોજાઈ હતી. જેમાં તમામ કોન્ટ્રાક્ટરોને બોલાવાયા હતા. પાલિકા વિસ્તારમાં ચાલતા વિકાસ કાર્યો અંગેનું બેઠકમાં સ્ટેટસ લેવામાં આવ્યું હતું. કામો કેટલે પહોંચ્યા, ક્યારે પુરા થશે? કોઈ અડચણ-મુશ્કેલી અંગેની તમામ વિગતો સભામાં એકઠી કરાઈ હતી. પાલિકા દ્વારા નવી ટીમ દ્વારા સરાહનીય ભ્રષ્ટાચાર મુક્ત કામગીરીનો પ્રારંભ થયેલો હાલ તો જોવા મળ્યો છે. પરંતુ આવ ભાઈ હરખા આપણે બેઉ સરખા જેવી ગતિવિધિઓ રાબેતા મુજબ ચાલુ ના થઈ જાય તેવુ પાલિકાના નવા સુકાનીઓએ સંભાળવું રહ્યું!
