-
ભાજપ હાઈકમાન્ડની સૂચનાથી રાજીનામું આપ્યુ હોવાની બાબુભાઈ પટેલની કબૂલાત
-
દમણ જિલ્લા પંચાયતમાંએક વર્ષ બે મહિના અને ચાર દિવસના કાર્યકાળમાં બાબુભાઈ પટેલે જાળવી રાખેલી પોતાની સ્વચ્છ અને પ્રમાણિક છબી
(વર્તમાન પ્રવાહ ન્યુઝ નેટવર્ક) દમણ, તા.03
દમણ જિલ્લા પંચાયતના પ્રમુખ પદેથી આજે શ્રી બાબુભાઈ પટેલે પ્રદેશ ભાજપ પ્રમુખ શ્રી દિપેશભાઈ ટંડેલ અને શિસ્ત સમિતિના શ્રી બાલુભાઈ પટેલની ઉપસ્થિતિમાં રાજીનામું આપવાની ઘોષણા કરતા ફરી એકવાર રાજકીય ગરમી વધવા પામી છે.
દમણ જિલ્લા પંચાયતના પ્રમુખ શ્રી બાબુભાઈ પટેલે ભાજપ હાઈ કમાન્ડની સૂચનાથી પોતે રાજીનામું આપ્યું હોવાની કબૂલાત પત્રકારો સમક્ષ કરી હતી. પ્રદેશ ભાજપની અખબારી યાદીમાં જિલ્લા પંચાયત પ્રમુખ શ્રી બાબુભાઈ પટેલે અંગત કારણોસર રાજીનામું આપ્યું હોવાનું જણાવ્યું છે.
અત્રે નોંધનીય છે કે, દમણ જિલ્લા પંચાયતના પ્રમુખ તરીકે શ્રી બાબુભાઈ પટેલ ગત તા.30મી નવેમ્બર, ર0ર0ના રોજ ચૂંટાઈ આવ્યા હતા. તેમની સ્વચ્છ અને ઈમાનદાર છબીના કારણે દમણ જિલ્લા પંચાયતનું પ્રમુખ પદ મળ્યું હતું. શ્રી બાબુભાઈ પટેલે એક વર્ષ બે મહિના અને ચાર દિવસ દમણ જિલ્લા પંચાયતના પ્રમુખ તરીકે પોતાનો વહીવટ કર્યો હતો.
શ્રી બાબુભાઈ પટેલે આપેલું રાજીનામું સ્વીકારાયા બાદ વચગાળાની વ્યવસ્થારૂપે દમણ જિલ્લા પંચાયતના ઉપ પ્રમુખ શ્રીમતી મૈત્રીબેન પટેલ પ્રમુખ તરીકેનોહવાલો સંભાળશે.
