તા.13 ફેબ્રુઆરીએ યોજાનારી બીનસચિવાલય, અને ક્લાર્ક આસિ.ની પરીક્ષા સરકારે રદ્દ કરતા મામલો ગરમાયો
(વર્તમાન પ્રવાહ વાપી બ્યુરો) વાપી, તા.11
ગુજરાત ગૌણ સેવા પસંદગી મંડળ દ્વારા આગામી તા.13 ફેબ્રુઆરીના રોજ બીનસચિવાલય ક્લાર્ક, ઓફિસ આસિ.ની જાહેર પરીક્ષા યોજાનારી હતી પરંતુ ગતરોજ સરકારે અચાનક પરીક્ષા રદ્દ કરી દીધી હતી. જેના પ્રત્યાઘાત પડતા વલસાડ જિલ્લા યુવા કોંગ્રેસ દ્વારા આજરોજ શુક્રવારે જિલ્લા મધ્યસ્થ કાર્યાલય સામે વિરોધ પ્રદર્શન અને સુત્રોચ્ચારો કર્યા હતા.
ગુજરાત ગૌણ સેવા પસંદગી મંડળ દ્વારા તા.13 ફેબ્રુઆરીના રોજ રાજ્યભરમાં બીનસચિવાલય ક્લાર્ક, ઓફિસ આસિસ્ટન્ટની જાહેર પરીક્ષા યોજાનારી હતી. આ પરીક્ષામાં વલસાડ જિલ્લામાં 16314 ઉમેદવારો પરીક્ષામાં બેસનાર હતા પરંતુ સરકારે 48 કલાક પહેલા જ અચાનક પરીક્ષા રદ્દ કરી દેતા વિદ્યાર્થીઓ અને ઉમેદવારોમાં નિરાશાનું મોજુ ફરી વળ્યુ હતું. પ્રદેશ યુવા કોંગ્રેસ દ્વારા આજે રાજ્યભરમાં આ બાબતે વિરોધ પ્રદર્શન કરવામાં આવ્યું છે તે અંતર્ગત વલસાડ જિલ્લા યુવા કોંગ્રેસ પ્રમુખ કુંજાલી ડી. પટેલ અને જિલ્લા કોંગ્રેસ પ્રમુખ દિનેશભાઈ પટેલના નેતૃત્વમાંવલસાડ કોંગ્રેસ મધ્યસ્થ કાર્યાલય સામે વિરોધ પ્રદર્શન યોજાયું હતું. છેલ્લા ત્રણ વર્ષથી આ પરીક્ષા લેવાતી નથી. છેલ્લા પેપર ફૂટી જતા પરીક્ષા રદ્દ થઈ હતી. અંતે પરીક્ષાની તારીખ જાહેર થતા નિરાશ થયેલા ઉમેદવારોમાં આશા જાગી હતી. લાંબા સમયથી પરીક્ષા માટે કરેલી તૈયારીઓ ઉપર પાણી ફરી વળતા ઉમેદવારોમાં ઘેરા પ્રત્યાઘાત અને નિરાશાનું મોજુ ફરી વળ્યું હતું.
