(વર્તમાન પ્રવાહ ન્યુઝ નેટવર્ક) દમણ, તા.10
આજે ચાર રાજ્યોમાં ભાજપને મળેલી પ્રચંડ જીતને વધાવવા દમણ ખાતે પ્રદેશ ભાજપ કાર્યાલયથી રાજીવ ગાંધી સેતુ સુધી એક રેલીનું આયોજન કરવામાં આવ્યું હતું. જેમાં પ્રદેશ ભાજપ પ્રમુખ શ્રી દિપેશભાઈ ટંડેલ, સાંસદ શ્રી લાલુભાઈ પટેલ, પૂર્વ સાંસદ શ્રી ગોપાલભાઈ કે.ટંડેલ(દાદા) સહિત મોટી સંખ્યામાં ભાજપના કાર્યકર્તાઓ જોડાયા હતા.ઢોલ-નગારા સાથે વાજતે ગાજતે નિકળેલી રેલીમાં સેંકડો લોકો પણ જોડાયા હતા. આ રેલીમાં દમણ જિ.પં.ના પ્રમુખ શ્રી નવિનભાઈ પટેલ, દમણ ન.પા. ના પ્રમુખ શ્રીમતી સોનલબેન પટેલ, જિલ્લા પંચાયત સભ્યો, કાઉન્સિલરો, સરપંચો સહિત પક્ષના વિવિધ હોદ્દેદારો પણ જોડાયા હતા.
દાદરા નગર હવેલી ખાતે પ્રદેશ ભાજપ પ્રમુખ શ્રી દીપેશભાઈ ટંડેલની અધ્યક્ષતામાં ચાર રાજ્યમાં મળેલી પ્રચંડ જીતને વધાવી સેલવાસ અટલ ભવનથી ઝંડાચોક અને કિલવણી નાકા સુધી રેલી કાઢવામાં આવી હતી. ઠેર ઠેર ફટાકડા ફોડી, મીઠાઈઓ વહેંચી ખુશી વ્યક્ત કરવામાં આવી હતી.
સેલવાસ ખાતેના કાર્યક્રમમાં સેલવાસ જિલ્લા પ્રમુખ શ્રી અજયભાઈ દેસાઈ, શહેર પ્રમુખ શ્રી આશિષ ઠક્કર, શ્રી દિગ્વિજયસિંહ પરમાર, મહિલા મોરચાના ઉપ પ્રમુખ શ્રીમતી પ્રમિલા ઉપાધ્યાય સહિત ભાજપના કાર્યકર્તા અને હોદ્દેદારો ઉપસ્થિત રહ્યા હતા.