સરપંચે મામલતદાર તથા ટીડીઓને જાણ કરતા ઘટના સ્થળે પહોંચ્યાઃ ચન્દ્રપુરની લાઈફ સેવર ટ્રસ્ટની ટીમે હોડી દ્વારા રેસ્કયુ કરી તમામને સલામત સ્થળે ખસેડયા
(વર્તમાન પ્રવાહ ન્યુઝ નેટવર્ક)
પારડી, તા.14: છેલ્લા કેટલાક દિવસથી સતત અનાધાર વરસી રહેલા વરસાદને લઈ ચારે તરફથી ફરી વળેલા પાણીને લઈ અનેક ગામો તથા ગામમાં આવેલ ઘરો સંર્પક વિહોણા થઈ ગયા હતા.
પારડી તાલુકાના આમળી સરપંચ ફળીયા ખાતે રહેતા બે કુટુંબીઓના 14 જેટલા સભ્યોના ઘરો વાડીમાં હોય ચારે તરફથી પાણી ફરી વળતા તેઓનું બહાર નીકળવું મુશ્કેલ બની ગયું હતું. આમળીના સરપંચ રાધાબેન ભરતભાઈ પટેલે આ અંગેની જાણ પારડી મામલતદાર ચૌધરી અને તાલુકા વિકાસ અધિકારી સની પટેલને કરવામાં આવતા તેઓ પારડી ચન્દ્રપુર ખાતે આવેલ માંગેલા લાઈફ સેવર ટ્રસ્ટની ટીમ સાથે ઘટના સ્થળે નીકળતા તેઓ પણ સૌ પ્રથમ પારડી ભેંસલાપાડથી પરિયા જતા રોડ અને ત્યારબાદ ડુંગરીથી આમળી જતા રોડ આ બન્ને રોડ પર આવેલા ખનકી પર પાણી ફરી વળતા રસ્તો બંધ હોય રોહિણાથી તરમાલિયા થઈ આમળી પહોંચી માંગેલા લાઈફ સેવર ટ્રસ્ટના જીગ્નેશ માગેલા, મંગેશ માગેલા, સતીષ માગેલા, મહેન્દ્ર માગેલા, ધનંજય માગેલા,હાર્દિક માગેલા, શશીકાંત માગેલા વિગેરે સભ્યોએ પાણીમાં ફસાયેલા તમામ 14 જેટલાસ્ત્રી, પુરુષો અને બાળકોને બોટ દ્વારા રેસ્કયુ કરી સહીસલામત રીતે બહાર કાઢી સલામત સ્થળે ખસેડયા હતા.