વર્તમાન પ્રવાહ વાપી બ્યુરો)
વાપી, તા.20: આજે તા.20 જુલાઈના રોજ ગુજરાત પ્રદેશ ભાજપ પ્રમુખ શ્રી સી.આર. પાટીલના હોદ્દા ઉપર બે વર્ષ પરીપૂર્ણ કરતા વાપી શહેર ભાજપ દ્વારા ઉજવણી કરવામાં આવી હતી.
દક્ષિણ ગુજરાતમાંથી પ્રદેશ ભાજપ પ્રમુખ તરીકે સી.આર. પાટીલની પ્રથમ વરણી છેતેથી ભાજપમાં કાર્યકરો, હોદ્દેદારોમાં શરૂઆતથી ઉત્સાહ-ઉમંગ જોવા મળી રહ્યો છે. નવસારીના સાંસદ શ્રી પાટીલએ સંગઠનના પ્રમુખ તરીકે બે વર્ષ પૂર્ણ કર્યા છે. તેથી સમગ્ર ગુજરાતમાં તેની ઉજવણી કરવામાં આવી છે તે અંતર્ગત આજે વાપી શહેર, તાલુકા અને નોટીફાઈડ ભાજપ પરિવાર દ્વારા ઉજવણી કરવામાં આવી હતી. આ ઉજવણીમાં વલસાડ જિલ્લા ભાજપ મહામંત્રી શિલ્પેશ દેસાઈ, પારડી વિધાનસભા પ્રભારી હેમંતભાઈ ટેલરની ખાસ ઉપસ્થિતિ હતી. વાપી તા. પ્રભારી પરેશભાઈ દેસાઈ, ન.પા. કારોબારી ચેરમેન મિતેશભાઈ દેસાઈ, શહેર મહામંત્રી વિરાજ દક્ષિણી, પાલિકા પૂર્વ પ્રમુખ વિઠ્ઠલભાઈ પટેલ, ન.પા.ના ચૂંટાયેલા સભ્યો સહિત કાર્યકરો ઉજવણીમાં જોડાયા હતા. શહેર પ્રમુખ સતિષભાઈ પટેલની આગેવાની હેઠળ સરદાર ચોકમાં આયોજીત થયેલી ઉજવણી કાર્યકરોએ ફટાકડા ફોડી ઉત્સાહભેર કરી હતી.
