પહેલી ડીલેવરીમાં ચાલક યુસુફ ઉસ્માનને સુરત જથ્થો પહોંચાડવાના 70 હજાર મળેલા : લાલચમાં બીજી વાર દારૂ ભરી જતા ઝડપાઈ ગયો
(વર્તમાન પ્રવાહ વાપી બ્યુરો)
વાપી, તા.05: વાપી હાઈવે ઉપરથી જી.આઈ.ડી.સી. પોલીસે સેલવાસથી રૂા.11.48 લાખનો દારૂનો જથ્થો કન્ટેનરમાં ભરી સુરત પલસાણા પહોંચાડવા નિકળેલ કન્ટેનર ચાલકને આજે બપોરે ઝડપી પાડયો હતો.
પ્રાપ્ત વિગતો મુજબ જી.આઈ.ડી.સી. પોલીસને મળેલી બાતમી આધારે વાપી હાઈવે ઉપર વોચ ગોઠવી હતી તે દરમિયાન બાતમી વાળુ કન્ટેનર આવતા પોલીસે ચેક કર્યુ તો તેમા રૂા.11.48 લાખનો દારૂનો જથ્થો ભરેલ મળી આવ્યો હતો. ચાલક યુસુફ ઉસ્માનની અટક કરીને પોલીસે પૂછપરછ કરતા ચોંકાવનારી વિગતો બહાર આવી હતી. યુસુફે કબુલાત કરી હતી કે એક મહિના પહેલાં નાનાભાઈએ ફોન નંબર આપી સેલવાસ મોકલ્યો હતો અને કહેલુ કે આ નંબર વાળો વ્યક્તિ મળશે અને દારૂનું કન્ટેનર ભરી આપશે. તારે ડિલેવરી કરી દેવાની. તે મુજબ એક મહિના પહેલાં દારૂનો જથ્થો સુરત પહોંચાડેલ. તેમાં યુસુફને રૂા.70 હજાર મળ્યા હતા તેથી આજે ફરી સેલવાસ પહોંચી પેલા ઈસમને ફોન કરેલો તેથી ફરી સુરત પલસાણા માટે રૂા.11.48 લાખનો જથ્થો ભરી આપેલ પલસાણા દારૂની ડિલેવરી થાય તે પહેલાં પોલીસે ઝડપી પાડી કન્ટેનર અને દારૂ સાથે રૂા.19.56 લાકનો મુદ્દામાલ જપ્ત કર્યો હતો. પોલીસે નાના ભાઈ આદિલ અને દારૂ ભરાવનાર મળી બે ઈસમોને વોન્ટેડ જાહેર કર્યા હતા.