નવસારી જિલ્લા- તાલુકાઓમાં કર્મચારીઓ ફરી હડતાલ પર ઉતરતા ગ્રામ પંચાયતોમાં લોકોના કામ અટવાઈ પડયા
(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.08: વીસીઇ કર્મચારીઓના સંગઠન દ્વારા ડીડીઓને પાઠવવામાં આવેલ આવેદનપત્ર માં જણાવ્યુ છે કે અગાઉ અચોક્કસ મુદતની હડતાલનું પર ઉતરતા મુખ્યમંત્રી અને પંચાયત મંત્રીશ્રી સાથે થયેલ બેઠકમાં તેમના દ્વારા કમિટી બનાવી માંગણીઓ બાબતે નિરાકરણ કરીશું તેવી ખાત્રી આપવામાં આવેલ હતી.તેથી અમે હડતાળ સ્થગિત રાખી હતી. પરંતુ આજે ત્રણમહિના જેટલો સમય વિતવા છતાં કોઈ નિરાકરણ ન આવતા ફરીથી અચોક્કસ મુદતની હડતાલ પર જઇ માંગણી ન સંતોષાય ત્યાં સુધી ચાલુ રાખવામાં આવશે.
વીસીઇ કર્મચારીઓ દ્વારા કમિશન બેઝ ઇ-ગ્રામ પોલીસ અપનાવી ફિક્સ વેતન 19,500/- સરકારી પગાર ધોરણ લાગુ કરવામાં આવે, 16-વર્ષથી વગર પગારે કામ કરતા હોય સરકારી કર્મચારી જાહેર કરી વર્ગ-3 માં સમાવેશ કરવામાં આવે, સરકારી લાભો અને રક્ષણ આપીને સમાન કામ સમાન વેતન આપવામાં આવે, જોબ સિકયુરિટી અને છુટા કરેલ વીસીઇને પરત લેવામાં આવે, કોરોના માહામારીમાં મરણ પામેલ વીસીઇને આર્થિક સહાય આપવામાં આવે, સ્પીડ ધરાવતી ઈન્ટરનેટ કનેક્ટિવિટી પુરી પાડવામાં આવે, વીસીઇની કામગીરી બાબતે જોબ ચાર્ટ નક્કી કરવામાં આવે એ મુજબની માંગણીઓ કરવામાં આવી છે.
વીસીઇ કર્મચારીઓ ફરીવાર હડતાલ ઉપર ઉતરતા ગ્રામ કક્ષાએ મળતી સેવાઓ ખોરવાતા લોકોને હાલાકી વેઠવાની નિબત આવી છે.
