શ્રીપાલ શેસ્માની વલસાડથી બદલી થતા રાજસ્થાન સમાજ અગ્રણી બળવંત તાપલ, બી.કે. દાયમાએ સાફો પહેરાવી સન્માન કર્યું
(વર્તમાન પ્રવાહ વાપી બ્યુરો)
વાપી, તા.21: તાજેતરમાં ગુજરાતમાં યોજાનાર સામાન્ય ચૂંટણીના ઉપલક્ષમાં ચૂંટણી પંચની સુચના અનુસાર ગુજરાત રાજ્ય પોલીસ બેડાના એસ.પી., એ.એસ.પી., પી.આઈ. કેડરના ઉચ્ચ અધિકારીઓની બઢતી અને બદલી સરકાર દ્વારા કરવામાં આવી હતી. તેમાં વાપીના એ.એસ.પી., આઈ.પી.એસ. શ્રીપાલ શેસ્માની ગાંધીનગર સુરક્ષા બળ કમાન્ડર તરીકે બદલી સાથે બઢતી આપવામાં આવી હતી. તેથી મૂળ રાજસ્થાન હોવાથી વાપી રાજસ્થાન સમાજ દ્વારા મંગળવારે રાજસ્થાન ભવનમાં શ્રીપાલ શેસ્માનો વિદાય અને અભિનંદન કાર્યક્રમ યોજાયો હતો.
રાજસ્થાન પ્રગતિના ટ્રસ્ટી બી.કે. દાયમા, અગ્રણી બળવંત તાપલ, અધ્યક્ષ રાજેશ દુગ્ગડ, જગદિશ તંવર, ગૌત્તમભાઈ, નવિન જૈન જેવા રાજસ્થાન વાપી સમાજના અગ્રણીઓ સહિત વિશાળ સંખ્યામાં ઉપસ્થિતોએ વાપી એ.એસ.પી.શ્રીપાલ શેસ્માનું રાજસ્થાની સાફો પહેરાવી, ફુલ પુષ્પગુચ્છોથી સમાજે બહુમાન કર્યું હતું. વાપી વિભાગમાં તેઓએ નવ મહિના સુધી ફરજ બજાવી કાયદા વ્યવસ્થા માટે કરેલી કામગીરીની સરાહના કરાઈ હતી. શ્રીપાલ શેસ્મા મૂળ રાજસ્થાન નાગૌર જિલ્લા વતની છે.
