(વર્તમાન પ્રવાહ ન્યુઝ નેટવર્ક) દમણ,તા.17
રાજ્ય કાનૂની સેવા સત્તા મંડળ, દમણ અને એડવોકેટ્સ બાર એસોસિએશનના સંયુક્ત નેજા હેઠળ છેલ્લા 2 સપ્તાહથી ઔદ્યોગિક એકમોમાં કામ કરતા શ્રમિકો અને તેમના બાળકો માટે દમણ જિલ્લામાં વિવિધ સ્થળોએ કાયદાકીય જાગૃતિ શિબિરોનું આયોજન કરવામાં આવી રહ્યું છે. જેમાં જિલ્લા બાળ અપરાધ સહિત અન્ય ગુનાઓ પર રોક લગાવી શકાય.
પ્રાપ્ત માહિતી અનુસાર, પ્રદેશના ઔદ્યોગિકએકમોમાં કામ કરતા કામદારો અને તેમના બાળકોને કાનૂની જાણકારી મળે તે હેતુથી આજે સોમવારે ભીમપોર ખાતે આવેલ સિલ્વર ઈન્ડસ્ટ્રીયલ એરિયામાં લીગલ સર્વિસ ઓથોરિટી દ્વારા એક જાગૃતિ શિબિરનું આયોજન કરવામાં આવ્યું હતું. આ શિબિરનો મુખ્ય ઉદ્દેશ ઔદ્યોગિક વિસ્તારમાં રહેતા શ્રમિકો અને તેમના પરિવારોને તેમના માટે બનેલા કાયદાઓ અને બાળ અપરાધ સામે રક્ષણ, પોક્સો એક્ટ સહિતના અન્ય કાયદાઓ વિશે માહિતગાર કરવાનો છે, જેથી ઔદ્યોગિક વિસ્તારોમાં થતી ગુનાહિત પ્રવૃત્તિઓને અટકાવી શકાય. શિબિરમાં કાયદાશાષાીઓએ જણાવ્યું હતું કે, મોટાભાગના લોકો કાયદાકીય જાણકારીના અભાવે ગુના કરે છે. આ જ કારણ છે કે રાજ્ય કાનૂની સેવા સત્તા મંડળ, દમણ દ્વારા છેલ્લા કેટલાક દિવસોથી કાનૂની જાગૃતિ શિબિરોનું આયોજન કરવામાં આવી રહ્યું છે અને લોકો સુધી પહોંચીને તેમને કાયદાકીય માહિતી આપવામાં આવી રહી છે.
