તાલીમમાં કોઈપણ જાતના કારણો આપ્યા વિના ગેરહાજર રહેનાર 7 જેટલા કર્મચારીઓને કારણદર્શક નોટિસ ફટકારાઈ
(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.14
176-વિધાનસભા બેઠકની ચૂંટણીને લઈને ચીખલી તાલુકાનું તંત્ર સજ્જ બન્યું છે અને 330-જેટલા પ્રીસાઇડિંગ ઓફિસર તથા 333-જેટલા પોલીંગ ઓફિસરની નિમણૂક કરી દેવામાં આવી છે. આ તમામ સ્ટાફને ચૂંટણી અધિકારી અમિતભાઇ ચૌધરી, મદદનીશ ચૂંટણી અધિકારી રોશનીબેન પટેલ, જે.એન.ચૌધરી સહિતનાની ઉપસ્થિતિમાં માસ્ટર ટ્રેનર્સ દ્વારા થિયરી તથા ઈવીએમને ઓપરેટ કરવા સહિતની બાબતે સઘન તાલીમ શિસ્તબધ્ધ રીતે આપવામાં આવી હતી.
આ તાલીમમાં કોઈપણ જાતના કારણો આપ્યા વિના ગેરહાજર રહેનાર 7-જેટલા કર્મચારીઓને ચૂંટણી જેવી રાષ્ટ્રીયકામગીરીમાં નિષ્કાળજી બદલ કારણદર્શક નોટિશ પાઠવી તેઓની વિરૂધ્ધ કાયદેસરની કાર્યવાહી પણ હાથ ધરવામાં આવી હોવાનું જાણવા મળ્યું હતું.
