આ સિઝન મેટીંગ ટાઈમ હોવાથી જંગલ-ખેતરોમાં વધુ જોવા મળે: ધરમપુર વાઈલ્ડ લાઈફના મુકેશભાઈ અને મંગુભાઈએ નર-માદાને સિફત પૂર્વક રેસ્ક્યુ કર્યા
(વર્તમાન પ્રવાહ વાપી બ્યુરો)
વાપી, તા.21: વલસાડ નજીક આવેલ કાપરીયા ગામે ખેડૂતના મકાનમાંથી અતિ ઝેરી ગણાતા રસેલ વાઇપર પ્રજાતિ માદાને ધરમપુર-નવસારી વાઈલ્ડ લાઈફના કાર્યકર્તાઓએ રેસ્ક્યુ કરીને જંગલ ખાતાને સોંપી દેવાયા હતા.
ગુજરાતના અન્ય પ્રદેશો કરતા વલસાડ-ડાંગ જંગલ વિસ્તાર હોવાથી વન્ય પ્રાણીઓ અને અજગર સાપ જેવા જનાવરો વધારે પ્રમાણમાં જોવા મળે છે. ગતરોજ વલસાડના કાપરીયા ગામે ઈન્દ્રજીત દેસાઈના ઘરે સાપની કાંસળી દેખાતા તેમણે ધરમપુર-નવસારીના વાઈલ્ડ લાઈફના કાર્યકર્તા મુકેશભાઈ આરવાયક અને મંગુભાઈને જાણ કરી હતી. બન્ને જણા કાપરીયા ધસી આવ્યા હતા. અત્યંત શોધખોળ અને જહેમત કરી વાઈલ્ડ લાઈફના કાર્યકરોએ ખુબ સિફતપૂર્વક અત્યંત ઝેરી એવા રસેલ વાઇપર નર-માદાને ઝડપી લીધા હતા. તેમણે જણાવ્યું હતું કે, આ સિઝન રસેલ વાઇપર સાપોની મેટીંગ પિરીયડ હોય છે. આ વાઈપર ખુબ ઝેરી હોય છે. ભારતભરમાં 50 થી 100 જેટલા લોકોના મૃત્યુ આ સાપ કરડવાથી થાય છે તેથીખેતર, વાડી, બગીચાઓમાં દેખા દેતા રસેલ વાઇપરથી ખુબ જ સાવધ સાવધાન ખેડૂતો-મજુરોએ રહેવાની જરૂર છે. બન્ને સાપને કાચની બરણીમાં સલામત રીતે રેસ્ક્યુ કરીને જંગલ ખાતાને સોંપી દેવામાં આવ્યા હતા.
