વિજ તાર નીચેથી પસાર થઈ રહેલા પિતા-પૂત્ર ગભરાઈ પાસેની દુકાનમાં દોડી ગયા બાદ શ્વાસ લીધા
(વર્તમાન પ્રવાહ વાપી બ્યુરો)
વાપી, તા.05: વાપી જી.આઈ.ડી.સી. ટાઉનશીપ ગુંજન વિસ્તારમાં સોમવારે બપોરે અચાનક જીવંત તાર નીચે પડી જતા વિસ્તારમાંઅફરા તફરી મચી જવા પામી હતી.
ઘટના સ્થળેથી પ્રાપ્ત વિગતો જાણવા મળ્યા મુજબ ગુંજન ચાર રસ્તા રાજા રાણી પાવવડાની દુકાન પાસેથી પિતા-પૂત્ર પસાર થઈ રહ્યા હતા ત્યારે દક્ષિણ ગુજરાત વિજ કંપનીનો હાઈટેન્શન વાયર અચાનક તૂટી પડયો હતો. તેથી પિતા-પૂત્ર ગભરાઈને નજીકની દુકાનમાં ઘૂસી જઈને નિરાંતનો શ્વાસ લીધો હતો. ઘટના બાદ વેપારીઓએ વિજ કંપનીને જાણ કરતા ટીમ ઘટના સ્થળે ધસી આવી હતી અને તાબડતોબ મરામતની કામગીરી આટોપી દીધી હતી. તાર પડવાથી ખોરવાયેલ વિજ પ્રવાહ એકાદ કલાકની બ્રેક બાદ ચાલુ થઈ ગયો હતો. અત્રે ઉલ્લેખનીય છે કે, અંડરગ્રાઉન્ડ વિજ લાઈનની કામગીરી પૂર્ણ થયા બાદ આ પ્રકારના અકસ્માતો અટકી જશે. ઘટનામાં કોઈને પણ ઈજા થવા પામી નહોતી.
