મોટા માથાઓનો બિન્દાસ્ત મોટો વેપારઃ નાનાઓને થતી પરેશાનીની મચેલી બૂમરાણ
(વર્તમાન પ્રવાહ ન્યુઝ નેટવર્ક)
દમણ, તા.26 : દમણ એક્સાઈઝ વિભાગને કડૈયા દરિયા કિનારેથી દારૂ ભરેલ એક ટેમ્પો અને એક હોડીને બરામદ કરવા સફળતા મળી છે. ટેમ્પોના ડ્રાઈવરને ભાગી જવા સફળતા મળી છે.
પ્રાપ્ત માહિતી પ્રમાણે દમણ એક્સાઈઝ વિભાગના ઈન્સ્પેક્ટર શ્રી મિલનકુમાર પટેલ અને એક્સાઈઝ ગાર્ડ શ્રી અમિત રાજભર, શ્રી અંકિત પટેલ, શ્રી મનિષ યાદવ, શ્રી સંજય સોલંકી અને શ્રી રોનિત પટેલને મળેલી ગુપ્ત માહિતીના આધારે કડૈયા દરિયા કિનારે પહોંચી રહ્યા હતા તે દરમિયાન એક ટેમ્પો બહારની તરફ નિકળી રહ્યો હતો. આ સમયે એક્સાઈઝ વિભાગની ગાડીને જોઈડ્રાઈવર ટેમ્પો છોડી ભાગી ગયો હતો. ટેમ્પોની તપાસ કરતાં તેમાં મોટી માત્રામાં દારૂનો જથ્થો મળ્યો હતો.
ત્યારબાદ એક્સાઈઝ વિભાગની ટીમે દરિયામાં એક હોડીને બાંધેલી જોતાં ત્યાં નજીક જઈ નિરીક્ષણ કરતાં તેમાં પણ મોટી માત્રામાં દારૂનો જથ્થો મળ્યો હતો. હોડીમાં બેસેલા તમામ લોકો રાત્રિના અંધકારનો લાભ લઈ જંગલમાં ભાગી જવા સફળ થયા હતા.
એક્સાઈઝ વિભાગે ગેરકાયદે દારૂની હેરફેર કરતા ટેમ્પો નંબર જીજે-05 બીઝેડ-9470 અને એક હોડીને જપ્ત કરી છે.
દમણ એક્સાઈઝ વિભાગે દારૂની ગેરકાયદે થતી હેરાફેરીને રોકવા શરૂ કરેલા અભિયાનને સારો પ્રતિસાદ મળી રહ્યો છે. પરંતુ દરરોજ ટ્રકો ભરીને દારૂનો જથ્થો પણ પગ કરી રહ્યો છે જે ઘણું સૂચક છે. મોટા માથાઓ 31મી ડિસેમ્બર દરમિયાન મોટો વેપાર કરી રહ્યા છે જ્યારે નાનાઓને પરેશાન કરાતા હોવાની બૂમ પણ ઉઠી રહી છે.