હાઈવે ઉપર એસ.ટી. બસમાં ચઢવા જતા અનીતાબેન નામની મહિલાને શીશુ સાથે ઝડપી પાડી
(વર્તમાન પ્રવાહ વાપી બ્યુરો)
વાપી, તા.14
વલસાડ સિવિલ હોસ્પિટલમાં ગતરોજ ચાર દિવસીય તાજા જન્મેલા શિશુની ચોરી થયાની ઘટના પ્રકાશમાં આવતા પોલીસ અને હોસ્પિટલ સંચાલકો દોડતા થઈ ગયા હતા. જો કે પોલીસે માત્ર બે કલાકમાં જ શીશુ ચોરી કરનાર મહિલાને હાઈવે ઉપર બસમાં ચઢતા પોલીસે ઝડપી પાડતા શીશુ ગુમાવનાર પરિવારના જીવમાં જીવ આવ્યો હતો.
પ્રાપ્ત વિગતો અનુસાર વલસાડ સિવિલ હોસ્પિટલમાં ચાર દિવસ પહેલા સુમનભાઈ ચૌહાણની પત્નીની પ્રસુતિ થઈ હતી. તેમની પત્ની પાસે આવીને એક મહિલાએ જણાવ્યું હતું કે, બાળકને રસીઆપવાની છે તેવુ જણાવી લઈ ગઈ હતી. થોડીવારમાં પરત કરી ગઈ હતી. બાદમાં બાળકનો કાચની પેટીમાં રાખવાનું જણાવી મહિલા ફરી નવજાત શીશુને લઈ ગઈ હતી તે પરત ના ફરતા પરિવારે તપાસ કરી તો મહિલા બાળક ચોરી નિકળી ગઈ હતી. ઘટનાની જાણ પોલીસને કરવામાં આવતા પોલીસે તપાસ કરતા જોયુ તો સી.સી.ટી.વી.માં ઘટના કેદ થઈ હતી. ચારે તરફ નાકાબંધ કરી તપાસ હાથ ધરાતા બે કલાક બાદ હાઈવે ઉપર બસમાં ચઢવા જતા પોલીસે મહિલાને શીશુ સાથે ઝડપી લીધી હતી. ઝડપાયેલા મહિલા સુરતમાં એકલી રહે છે. મૂળ કોસમકુવાની વતની છે તેવુ પોલીસે જણાવ્યું હતું.