નિષ્ણાંત સર્જનો દ્વારા માહિતી-માર્ગદર્શન અને પેનલ ડિસ્કશનનું આયોજન
(વર્તમાન પ્રવાહ વાપી બ્યુરો)
વાપી, તા.05 : વાપીમાં કાર્યરત સાન્દ્રાબેન શ્રોફ કોલેજ ઓફ નર્સિંગમાં બે દિવસીય બર્ન સારવારનો સેમિનારનો પ્રારંભ થયો છે. બર્ન કેસમાં દાઝેલી મહિલા કે પુરુષને પ્રથમ સારવાર કઈ રીતે આપવા સહિત દાઝેલા ભાગો ઉપર કોસ્મેટિક સર્જરી કેવી રીતે કરવી તેનું માર્ગદર્શન નિષ્ણાંત તબીબો દ્વારા સેમિનારમાં આપવામાં આવ્યું હતું.
વાપી-ગુજરાત, મહારાષ્ટ્ર ઔદ્યોગિક વિસ્તાર હોવાથી અવારનવાર ઘટતી ફાયરની ઘટનાઓમાં કર્મચારીઓ દાઝી જતા હોય છે. તેવા દાઝેલા કર્મચારી પુરુષ કેસ્ત્રીની પ્રાથમિક સારવાર કેવી રીતે કરવી તેવા ઉદ્દેશ સાથે એસ.એસ.આર.સી.એન એકેડેમીક એડવાઈઝર મેજર જનરલ ટી.કે. ભુતિયાએ જણાવ્યું હતું કે, ફાયર કે એસિડ બર્નના કેસમાં દર્દીને સારવાર કેવી રીતે આપવી તે અંગે સેમિનાર અને માર્ગદર્શનનું આયોજન કરાયું છે. આ અંગે નિષ્ણાંત સર્જનો સાથે પેનલ ડિસ્કશન પણ રાખવામાં આવ્યું હતું. દાઝેલી મહિલાઓ સાથે જલદી કોઈ લગ્ન કરવા તૈયાર થતું નથી તેથી પ્લાસ્ટીક સર્જરી પીડીત મહિલાને નવજીવન આપીશકે છે. નર્સિંગમાં અભ્યાસ કરતા વિદ્યાર્થીઓએ સેમિનારમાં ઉત્સાહપૂર્વક ભાગ લઈ અગત્યની માહિતી મેળવી હતી.
