-
હત્યારાઓએ ધારધાર હથિયાર વડે યુવકનું ગળુ કાપવાની કરેલી કોશિષ -
મૃતક યુવક મુળ રહેવાસી ઓરિસ્સાનો અને દમણમાં કૂક તથા કેટરિંગનું કામ કરતો હતો
(વર્તમાન પ્રવાહ ન્યુઝ નેટવર્ક)
દમણ, તા.31: દમણના કચીગામમાં સોમવારે એક યુવકની હત્યા કરીને વાડી નજીકના નાળામાં ફેંકી દેવાની ઘટના પ્રકાશમાં આવી હતી.
પ્રાપ્ત માહિતી મુજબ નાની દમણના કચીગામમાં સોમવારના રોજ એક વાડી નજીક એક યુવકની હત્યા કરીને લાશને નાળામાં ફેંકી દેવાની ક્રુર ઘટના અંગેની ખબર કચીગામ પોલીસને મળી હતી. કચીગામ પોલીસ ચૌકીના ઈન્ચાર્જ ભાવિની હળપતિએ ટીમ સાથે ઘટના સ્થળનું નિરીક્ષણ કર્યું હતું. પોલીસે ગંદા નાળામાંથી હત્યા કરાયેલ યુવકની લાશને બહાર કાઢી તપાસ કરતા 33 વર્ષીય ગૌરીશંકર મૂળ રહેવાસી ઓરિસ્સાનો હોવાનું જણાયું હતું.
પોલીસે વધુમાં જણાવ્યું કે, મૂળ ઓરિસ્સાના રહેવાસી ગૌરીશંકર (ઉ.વ.33) દમણમાં કૂક અને કેટરિંગનું કામ કરતો હતો. મંગળવારે સવારે મૃતકની લાશ કચીગામમાં એક વાડી નજીકના ગંદા નાળામાંથી મળી આવી હતી. જ્યાં મૃત યુવકના ગળામાં ધારદાર હથિયારથી હૂમલો કરેલાના ઊંડા નિશાન જોવા મળ્યા હતા. ગળા ઉપરના નિશાનથી ખબરપડી કે મૃતકની હત્યા દરમિયાન તેની બેરહેમી અને ક્રુરતાપૂર્વક ગળું કાપવાની કોશિષ કરી હતી.
પોલીસે અજાણ્યા વ્યક્તિઓ વિરૂદ્ધ ભારતીય દંડ સંહિતાની કલમ 302 મુજબ કેસ નોંધી ઘટના અંગેની આગળની વધુ તપાસ શરૂ કરી છે.
