લોકોની આર્થિક જરૂરિયાત પૂરી કરવા પોલીસની નવતર પહેલ
લોકોને સરળતાથી લોન મળી શકશે : એસ.પી સાબરકાંઠા
(વર્તમાન પ્રવાહ ન્યુઝ નેટવર્ક)
હિંમતનગર, તા.03 : સાબરકાંઠા જિલ્લાના હિંમતનગર ડીએસપી કચેરી ખાતે સાબરકાંઠા જિલ્લા પોલીસ દ્વારા લોન મેળાનું આયોજન કરવામાં આવ્યું હતું. તમામ ખાનગી અને સહકારી બેંકો તેમજ જિલ્લા ઉદ્યોગ કેન્દ્ર અને નગરપાલિકાના સહયોગથી આ લોન મેળાનું આયોજન કરવામાં આવ્યું હતું. ગુજરાત પોલીસ દ્વારા વ્યાજખોરી ડામવા માટે ઝુંબેશ હાથ ધરવામાં આવ્યો છે જેમાંસાબરકાંઠા જિલ્લામાં પણ પોલીસ સક્રિય બની છે અને આવા ગેરકાયદેસર વ્યાજખોરીનો ધંધો કરતા ઈસમો ઉપર કાર્યવાહી હાથ ધરવામાં આવેલ છે, જેના કારણે લોકોને વ્યાજ ખોરોનો ત્રાસ કાયમી દૂર થયો છે. સાબરકાંઠા પોલીસ દ્વારા જિલ્લા પોલીસવડા વિશાલકુમાર વાઘેલાની આગેવાનીમાં જિલ્લાના તમામ વિસ્તારોમાં લોક દરબાર પણ યોજવામાં આવ્યા હતા તો બીજી તરફ સાબરકાંઠા જિલ્લા પોલીસ દ્વારા તમામ ખાનગી અને સહકારી બેંકો તેમજ જિલ્લા ઉદ્યોગ કેન્દ્ર અને નગરપાલિકાના સહયોગથી ડીએસપી ઓફિસ ખાતે લોન મેળાનું આયોજન કરવામાં આવ્યું હતું.
જિલ્લા પોલીસ વડાની ઉપસ્થિતિમાં આ કાર્યક્રમ યોજાયો હતો. તમામ ખાનગી બેંકો અને સહકારી બેંકોના સ્ટોલ પણ લગાવવામાં આવ્યા હતા, સાથે જ જિલ્લા ઉદ્યોગ કેન્દ્ર અને નગરપાલિકા દ્વારા આર્થિક સહાય મેળવવા માટેના સ્ટોલ પણ લગાવવામાં આવ્યા હતા. કાર્યક્રમમાં મોટી સંખ્યામાં જરૂરતમંદ લોકો હાજર રહ્યા હતા અને આર્થિક સહાયની યોજનાઓનો લાભ લીધો હતો.
લોન મેળા કાર્યક્રમમાં સાબરકાંઠા જિલ્લા પોલીસ અધિક્ષક વિશાલકુમાર વાઘેલા, જિલ્લા ઉદ્યોગ કેન્દ્રના નીનામા, નગરપાલિકા પ્રમુખ યતીનબેન મોદી, નાયબ પોલીસ અધિક્ષક પાયલ સોમેશ્વર, પીઆઈ એચ.બી.વાઘેલા, પીએસઆઈ એ.વી. જોશી તેમજ ખાનગી અને સહકારી બેંકનાસત્તાધીશો આ કાર્યક્રમમાં ઉપસ્થિત રહ્યા હતા.
