પ્રાથમિક વિભાગમાં પરિયારી (ગુજરાતી માધ્યમ) અને ઉચ્ચ પ્રાથમિક વિભાગમાં દમણવાડા (અંગ્રેજી માધ્યમ) ચેમ્પિયન
(વર્તમાન પ્રવાહ ન્યુઝ નેટવર્ક)
દમણ,તા.03: તા.02અને 03 ફેબ્રુઆરી, 2023ના બે દિવસીય મોટી દમણ કોમ્પલેક્ષનો પ્રાથમિક અને ઉચ્ચ પ્રાથમિક શાળા રમતગમત મહોત્સવ નાયલા પારડી મેદાન, પરિયારી મુકામે યોજાયો હતો. જેમાં સરકારી પ્રાથમિક અને ઉચ્ચ પ્રાથમિક શાળા પરિયારી(ગુજરાતી માધ્યમ), પરિયારી (અંગ્રેજી માધ્યમ), દમણવાડા (અંગ્રેજી માધ્યમ), ઝરી( અંગ્રેજી માધ્યમ), પટલારા, ભામટી, આંબાવાડી, ભરવાડ ફળિયા અને થાણા પારડી એમ કુલ નવ શાળાઓએ ભાગ લીધો હતો. રમતોત્સવમાં બાળકો જ નહીં પરંતુ શિક્ષકો માટે પણ આ વખતે વિવિધ રમતોનું આયોજન કરવામાં આવ્યું હતું.
પ્રથમ દિવસે પરિયારી ગ્રુપ ગ્રામ પંચાયતના સરપંચ શ્રીમતી પંકતિબેન પટેલના હસ્તે રમત મહોત્સવને ખુલ્લો મૂકવામાં આવ્યો હતો અને પ્રથમ દિવસે પ્રાથમિક વિભાગના બાળકો માટેની રમતો રમાડવામાં આવી હતી. જેમાં સરકારી પ્રાથમિક શાળા પરિયારી (ગુજરાતી માધ્યમ) કોમ્પલેક્ષ લેવલે ચેમ્પિયન બની હતી. જ્યારે બીજા દિવસે ઉચ્ચ પ્રાથમિક વિભાગના બાળકો અને શિક્ષકોની રમતો રમાડવામાં આવી હતી. જેમાં દિવસના અંતે દમણવાડા ઉચ્ચ પ્રાથમિક શાળા( અંગ્રેજી માધ્યમ) ચેમ્પિયનબની હતી.
આ મોટી દમણ કોમ્પલેક્ષ રમતોત્સવના હેડ શ્રીમતી સુમનબેન પટેલ અને સહાયક કોમ્પલેક્ષ હેડ શ્રી અરવિંદભાઈ સુમરા રહ્યા હતા. બી.આર.સી. કો-ઓર્ડિનેટર શ્રીમતી ભાવિનીબેન દેસાઈએ મોટી દમણ કોમ્પલેક્ષ રમતોત્સવનું શાનદાર રીતે આયોજન કરવા બદલ મોટી દમણ કોમ્પલેક્ષ રમતોત્સવના હેડ શ્રીમતી સુમનબેન પટેલ અને સહાયક કોમ્પલેક્ષ હેડ શ્રી અરવિંદભાઈ સુમરાને અભિનંદન પાઠવ્યા હતા. દરમિયાન સહાયક કોમ્પલેક્ષ હેડ શ્રી અરવિંદભાઈ સુમરાનું શાલ ઓઢાડીને વિશેષ સન્માન સી.આર.સી. કો-ઓર્ડિનેટર મોટી દમણ શ્રી સુનીલભાઈ હળપતિએ કર્યું હતું.