અબ્રામા સિડમેક કંપનીમાં અજગર દેકાતા પારડી જીવદયા ગૃપને જાણ કરાતા મિતેશ પટેલે કુનેહથી ચાર અજગર રેસ્ક્યુ કર્યા
(વર્તમાન પ્રવાહ વાપી બ્યુરો)
વાપી, તા.08: વલસાડ જિલ્લામાં એવરેજ એકલ દોકલ અજગરો ક્યારેક ક્યારેક દેખા દેતા હોય છે પરંતુ ગજબની ઘટના વલસાડની એક કંપનીમાં આજે બુધવારે ઘટી હતી. કંપનીની અવાવરુ જગ્યામાંથી અધધ ચાર જેટલા અજગર એક સાથે પારડી જીવદયા ગૃપના કાર્યકરોએ રેસ્ક્યુ કર્યા હતા.
વલસાડ અબ્રામા નેશનલ હાઈવે નજીક આવેલ સિડમેક લેબોરેટરીઝ પ્રા.લી. કંપનીમાં અવાવરુ જગ્યામાં અજગર દેખાદેતા કંપની મેનેજર સુનિલભાઈ પટેલએ પારડી જીવદયા ગૃપને કોલ આપ્યો હતો. ગૃપના મિતેશ પટેલ અને તેમની ટીમ વલસાડ કંપનીમાં પહોંચી ગઈ હતી. કંપનીમાં એક અજગર બહાર કાઢતા બીજો, ત્રીજો અને ચોથો અજગર અવાવરૂ જગ્યામાં ઘાસ-કચરામાં લખાયેલા મળી આવ્યા હતા તે પૈકી એક માદા-20 કિ.ગ્રા. નર 15 કિ.ગ્રામ અને બે નાના અજગર 8-8 કિ.ગ્રામના હતા. અજગરો પકડવાનુંજોખમી ઓપરેશન મિતેશ પટેલએ કુનેહ અને હિંમતથી પાર પાડયું હતું. તમામ અજગરોને ચણવઈ વન વિભાગને સોંપી દેવામાં આવ્યા હતા. જંગલ વિભાગે અજગરોને જંગલમાં છોડવાની તજવીજ હાથ ધરી હતી. મિતેશ પટેલએ જણાવ્યું હતું કે, આ અવાવરુ જગ્યામાં અજગરએ ઈંડા મુક્યા હશે તેથી એક સાથે ચાર અજગર મળી આવ્યા છે. અજગરનું રેસ્ક્યુ કરવા બદલ મિતેશ પટેલની કામગીરીને કંપની મેનેજર સુનીલભાઈ પટેલે બિરદાવી અભિનંદન પાઠવ્યા હતા.
