(વર્તમાન પ્રવાહ ન્યુઝ નેટવર્ક)
સરીગામ, તા.20: ઉમરગામ તાલુકાના તુંબ ખાતે કાર્યરત વારી એનર્જીસ લિમિટેડ કંપની બાજુમાંથી પસાર થયેલું કુદરતી વહેણમાં ગેરકાયદેસર બોરિંગ બનાવી પાણીની ચોરી કરી રહી હોવાની ફરિયાદ યુવા શક્તિ સંગઠન દ્વારા સેન્ટ્રલ ગ્રાઉન્ડ વોટર બોર્ડ અમદાવાદ કરવામાં આવી છે. કંપનીએ બોરિંગમાં ટુ એચપીની મોટર બેસાડી બોરિંગથી કંપની સુધી પાઈપલાઈન બીછાવી પાણીનો જથ્થો બેરોકટોક હાંસલ કરવામાં આવી રહ્યો હોવાનું સ્થળ નિરીક્ષણ કરતા જણાવી રહ્યું છે. કંપનીના પ્રોડક્શનમાં અને અન્ય વપરાશ માટે જરૂરી પાણીનો જથ્થો આ પ્રકારના ગેરકાયદેસરસ્ત્રોતો ઊભા કરી હાંસલ કરવામાં આવી રહ્યો હોવાનો આરોપ મૂકી કંપની સામે ચોરીની ફરિયાદ દાખલ કરવા જણાવ્યું છે. આ પ્રકારની કંપનીની ગેરકાયદેસર પ્રવૃત્તિથી કુદરતી જળ સંપતિને ભારે નુકસાન થતું હોવાનું જણાઈ રહ્યું છે તેમજ આ વિસ્તારના બોરિંગના પાણી પણ ઊંડા ઊતરી ગયા હોવાનું જણાવ્યું છે. જેની સામે તાત્કાલિક અસરથી પગલાં ભરવા સેન્ટ્રલ ગ્રાઉન્ડ વોટર બોર્ડ અમદાવાદનેફરિયાદ કરી છે અને જેની જાણકારી ઉમરગામ મામલતદાર કચેરીને પણ કરવામાં આવી છે.
