આર્થિક ભારણ અને પરિવારનો કંકાસથી શ્રમિક યુવતિ કંટાળી ગઈ હતી
(વર્તમાન પ્રવાહ વાપી બ્યુરો)
વાપી, તા.04: વલસાડ તિથલ બીચ ઉપર એક યુવતિએ ગુરૂવારે સાંજે અને આજે એમ બે બે વાર દરિયામાં આપઘાત કરવાની કોશિષ કરી હતી. બન્ને વખત ફરજ પરના જી.આર.ડી. જવાનો અને સ્થાનિક લારીવાળાઓએ યુવતિને ઉગારી લીધી હતી.
તિથલ દરિયા કિનારે ગુરૂવારે સાંજે દરિયામાં દુર દુર ચાલતી જઈ રહેલી એક યુવતિને હિરેન પટેલ નામનો સહેલાણી જોઈ જતા લારી સંચાલકને જાણ કરી હતી. ઘટનાની જાણ જી.આર.ડી. જવાનોનેથતા જવાનોએ યુક્તિ પૂર્વક યુવતિને બચાવી લીધી હતી. બચાવાયેલી યુવતિ આજે શુક્રવારે બપોરે ફરી દરિયામાં આપઘાત કરવા આવી હતી. ગઈકાલે લોકોએ સમજાવી યુવતિને ઘરે મોકલી હતી. પરંતુ આજે ફરીવાર દરિયામાં આપઘાત કરવા આવી પહોંચી હતી. જી.આર.ડી.એ સી.ટી. પોલીસને જાણ કરતા પોલીસ યુવતિને લઈ ગઈ હતી. તેના વાલી વારસોને જાણ કરાઈ હતી. તપાસમાં બહાર આવ્યું હતું કે, યુવતિની નોકરી છૂટી જતા આર્થિક સંકટ તથા પરિવારના કાયમી કંકાસથી કંટાળી ગઈ હોવાથી આપઘાત કરી મરી જવાનો પ્રયાસ કરતી રહી હતી.
