(વર્તમાન પ્રવાહ ન્યુઝ નેટવર્ક)
પારડી, તા.20: વાપીથી વેલપરવા કોથરવાડી થઈ પલ્સર બાઈક નંબર જીજે 15- એએફ-2195 પર બે ઈસમો દારૂનો જથ્થો લઈ વલસાડ જવાના હોવાની બાતમી પેટ્રોલિંગ કરતી પારડી પોલીસ મથકના પોલીસ કોન્સ્ટેબલ ક્રીપાલસિંહને મળતા વેલપરવા કોળીવાડ આગળ વોચ ગોઠવી હતી.
જે દરમ્યાન બાતમીવાળી બાઈક આવતા પોલીસેઅટકાવવાનો પ્રયાસ કરતાં ખેપિયોએ પૂરપાટ ઝડપે બાઈકને હંકારી મૂકી આગળ ચાલતાં વાહનને ઓવર ટેક કરવામાં કાબૂ ગુમાવતાં બાઈક રોડ નીચે ઉતરી ઝાડ સાથે અથડાઈ હતી. આ દરમિયાન પાછળ બેસેલો વિશાલ ઉર્ફે રાહુલ નાયકા રહે.વલસાડ ધમડાચી ભાગવામાં સફળ રહ્યો હતો. પરંતુ બાઈક ચાલકનો પગ બાઈક નીચે દબાઈ જતાં સુનિલ ઉર્ફે ચાંગો રામદયાલ વર્મા રહે.વલસાડ ધમડાચી ખેરગામ ઝડપાઈ ગયો હતો. પોલીસને તપાસ દરમિયાન આ બાઈકની પેટ્રોલ ટાંકી અને સીટ નીચે બનાવેલ ચોર ખાનામાંથી 29400 નો દારૂ મળી આવતા બાઈક અને દારૂ મળી 64400 નો મુદ્દામાલ કબ્જે લઈ વધુ કાર્યવાહી હાથ ધરી છે.
