પોલીસે ઘાયલ ત્રણ યુવાનોને સારવાર માટે અમિત હોસ્પિટલમાં ખસેડયા
(વર્તમાન પ્રવાહ વાપી બ્યુરો)
વાપી, તા.21: ભિલાડથી નવસારી સુધીનો નેશનલ હાઈવે નં.48 અકસ્માત ઝોન બની ચુક્યો છે. પ્રતિદિન એવરેજ એક-બે અકસ્માત સર્જાતા રહે છે તેવો વધુ એક અકસ્માત આજે મંગળવારે મળસ્કે ગુંડલાવ ચોકડી હાઈવે ઉપર સુરત જતી ટ્રેક ઉપર સર્જાયો હતો. મુંબઈ થાનાથી દિલ્હી જવા માટે નિકળેલા ત્રણ મિત્રોની હોન્ડાસીટી કાર આગળ ચાલી રહેલી ટ્રકએ અચાનક બ્રેક મારતા કાર ટ્રકમાં ઘૂસી જતા અકસ્માત સર્જાયો હતો. અકસ્માતમાં ત્રણ યુવાનો ઘાયલ થતા સારવાર માટે હોસ્પિટલમાં ખસેડાયાહતા.
અકસ્માતની પ્રાપ્ત વિગતો અનુસાર મુંબઈ-થાનેથી હોન્ડાસીટી કાર નં.એમએચ 04 જીઝેડ 2030માં સવાર થઈને ત્રણ મિત્રો દિલ્હી જવા માટે બાય રોડ નિકળ્યા હતા ત્યારે વલસાડ હાઈવે ગુંડલાવ ઓવરબ્રિજ નજીક પુરઝડપે દોડી રહેલી કાર આગળ જતી ટ્રક ચાલકે બ્રેક મારતા ટ્રકમાં ઘૂસી ગઈ હતી. અકસ્માતમાં કારનો ખુડદો બોલી ગયો હતો. સવાર ત્રણ યુવાનો ઘાયલ થયા હતા. પોલીસે તેમને અમિત હોસ્પિટલમાં સારવાર માટે ખસેડી વધુ તપાસ હાથ ધરી હતી.