34 વર્ષિય બિલકીસ મંડલ ફલેટ નં.204 માં એકલી રહેતી હતી : મિત્રએ વારંવાર ફોન કર્યો : તપાસ કરતા મૃત હાલતમાં મળી
(વર્તમાન પ્રવાહ વાપી બ્યુરો)
વાપી, તા.20: વાપી છીરી રણછોડ નગરમાં આવેલ ગાયત્રી કોમ્પલેક્ષમાં હત્યા કરાયેલી મહિલાની લાશ મળી આવતા સમગ્ર વિસ્તારમાં ચકચાર મચી જવા પામી હતી.
વાપી છીરી ગાયત્રી કોમ્પલેક્ષ ફલેટ નં.204 માં મૂળ બંગાળની 34 વર્ષિય બિલકીસ મંડલ છેલ્લા કેટલાક સમયથી એકલી રહેતી હતી.બુધવારે સાંજના બિલકીસના મિત્રએ વારંવાર ફોન કર્યો પણ બિલકીસ ફોન નહિ ઉપાડતા તે તેના ઘરે પહોંચ્યો હતો. ઘર ખુલ્લુ પડેલું હતું. ઘરમાં પ્રવેશતાં જ બિલકીસ મૃત હાલતમાં પડેલી હતી તે જોઈ મિત્ર ડઘાઈ ગયો હતો. તેણે પડોશીઓને જાણ કરતા લોકો ભેગા થઈ ગયા હતા. બનાવની જાણ પોલીસને કરવામાં આવતા પી.આઈ. ભરવાડ ટીમ સાથે દોડી ગયા હતા. તપાસમાં જણાવેલુ કે બિલકીસને ગળે ટુંપો આપી હત્યા કરાયેલી છે. પોલીસે લાશને પી.એમ. માટે મોકલી આપી હતી. બિલકીસની હત્યા કોણે કરી? કયા કારણોસર થઈ તેની વધુ આગળની તપાસ પોલીસે હાથ ધરી હતી.
