રોકડા રૂા.15 હજારનો પણ ફટકારેલો દંડઃ જો રૂા.15 હજાર નહીં ભરે તો વધુ એક વર્ષની સાદી કેદની સંભળાવેલી સજા
(વર્તમાન પ્રવાહ ન્યુઝ નેટવર્ક)
સેલવાસ, તા.20: સેલવાસના આમલી ફુવારા નજીક આવેલ સોસાયટીમાં રહેતા યુવાનનુ ગળું દબાવી હત્યા કરવાના ગુનામાં આરોપીને આજે સેલવાસ ડીસ્ટ્રીકટ કોર્ટ દ્વારા આજીવન કેદ અને રૂા.15 હજારના દંડની સખ્ત સજા ફટકારવામાં આવી હતી.
વર્ષ 2020ના ઓક્ટોબર મહિનામાં કરમખલ લવાછા ગામના રહેવાસી અવધેશ બહાદુર સિંહે સેલવાસ પોલીસ સ્ટેશનમાં ફરિયાદ નોંધાવી હતી કે, આમલી ફુવારા નજીક પૂજા વ્યુ સોસાયટીમાં જીગ્નેશ ભીખાભાઈ વાળંદે એમના પુત્ર ભાનુપ્રતાપ અવધેશ બહાદુર સિંહનું ગળું દબાવી હત્યા કરી છે. જે સંદર્ભે સેલવાસ પોલીસે આઇપીસીની કલમ 302, 201 મુજબ ફરિયાદ નોંધી હતી. ફરિયાદ મુજબ વધુ તપાસ એસ.એચ.ઓ. શ્રી સબાસ્ટીયન દેવાસિયાને સોંપવામાં આવી હતી.
તપાસ દરમ્યાન હત્યાનો આરોપી જીગ્નેશ ભીખાભાઈ વાળંદની ધરપકડ કરવામાં આવી હતી. ત્યારબાદ આ કેસ સેલવાસના ડિસ્ટ્રીક્ટ કોર્ટમાં દાખલ કર્યા બાદ સાક્ષીઓના નિવેદનના આધારે અને પુરાવાઓના આધારે માનનીય સત્ર ન્યાયાધીશ શ્રી એસ.એસ.અડકરે આરોપીને આઈપીસી 302 મુજબ સખત આજીવન કેદઅને રોકડ 15 હજારનો દંડ કરવાનો શકવર્તી ચુકાદો સંભળાવ્યો હતો. અને જો આરોપી દંડ નહીં ભરે તો વધુ એક વર્ષની સાદી કેદની સજા પણ સંભળાવવામાં આવી હતી.
સુનાવણી દરમિયાન ફરિયાદી તરફથી એડવોકેટ શ્રી ગોરધન પુરોહિતે ધારદાર દલીલો રજૂ કરી હતી.