મેજર પાઈપલાઈનનું સમારકામ કરવાનું હોવાથી પાણી સપ્લાય બંધનો લેવાયેલ નિર્ણય
(વર્તમાન પ્રવાહ વાપી બ્યુરો)
વાપી, તા.04: વાપી નગરપાલિકા દ્વારા આવતીકાલ તા.05ને શુક્રવારના રોજ આખા દિવસ માટે પાણી સપ્લાય બંધ રાખવાનો નિર્ણય લેવાયો હોવાથી લોકોમાં રોષ જોવા મળી રહ્યો હતો.
ઉનાળાના સમયમાં વાપી વિસ્તારમાં સામાન્ય રીતે ભૂગર્ભ જળ આમ પણ નીચે જતા હોવાથી શહેરમાં પાણીની કારમી ખેંચ, તંગી વર્તાઈ રહી છે. જેમાં કાળમાં અધિક માસની જેમ તા.05ને શુક્રવારના રોજ વાપી નગરપાલિકા દ્વારા આખો દિવસ પાણી પુરવઠો બંધ રાખવાની જાહેરાત કરવામાં આવી છે. મુખ્ય પાઈપલાઈનનું સમારકામ હાથ ધરાવવાનું હોવાથી દિવસ દરમિયાન પાણી સપ્લાય બંધ રહેશે તેવુ પાલિકા સુત્રો દ્વારાજણાવાયું છે. આમ પણ શહેરમાં પાણીની બુમાબુમ ચાલી રહી છે. ટેન્કરોથી પાણી મંગાવી કેટલીક સોસાયટીઓ પાણી સમસ્યા ઓછી કરી રહી છે ત્યાં પાલિકાનું પાણી બંધ રહેશે ત્યારે શહેરના નાગરિકોમાં વ્યાપક રોષ ફેલાયેલો જોવા મળ્યો હતો. કેટલીક સોસાયટીઓમાં આગામી ઉપર ભુગર્ભ જળના પાણી બોરિંગથી ખેંચી કામ ચલાવાઈ રહ્યું છે તે પણ માંડ માંડ કારણ કે ભુગર્ભ જળના લેવલ દિવસે દિવસે ઘટી રહ્યા છે.