રૂા.61.90 કરોડને ખર્ચે તૈયાર થઈ રહેલ આર.સી.સી. રોડ કામગીરીમાં વેઠ
(વર્તમાન પ્રવાહ વાપી બ્યુરો)
વાપી, તા.24: વાપી જી.આઈ.ડી.સી. ચાર રસ્તાથી પસાર થતાં સેલવાસ માર્ગ હાલમાં આર.સી.સી. બનાવવાની કામગીરી ચાલી રહીછે. તેની સાથે સાથે વરસાદી પાણીના નિકાલ માટે બન્ને સાઈડ ડ્રેનેજની કામગીરી પણ ચાલી રહી છે. આ કામગીરી તકલાદી અને નરી વેઠ ઉતારાઈ હોવાની ચોંકાવનારી વિગતો નજરે પડી રહી છે.
પ્રાપ્ત વિગતો અનુસાર નેશનલ હાઈવે ઓથોરીટી દ્વારા એન.એછ. 56 અંતર્ગત જી.આઈ.ડી.સી. ચાર રસ્તાથી સેલવાસ માર્ગનું આર.સી.સી. કરણની કામગીરી ચાલી રહી છે. આ કામની સાથે સાથે ડિવાઈડર અને વરસાદી પાણીના નિકાલ માટે ગટર બનાવવાનો કોન્ટ્રાક્ટ 61.90 કરોડનું કામકાજ નિયતી કન્સ્ટ્રકશનને આપવામાં આવ્યું છે. આ કામ 12 મહિનાની અવધિમાં પૂર્ણ કરવાનું છે. હાલમાં ચાર રસ્તા નજીક સરદાર ભિલાડવાળા બેંક સામે વરસાદી ડ્રેનેજની કામગીરી ચાલી રહી છે. આ કામ હલકી કક્ષાનું અને તકલાદી હોવાથી એક જાગૃત નાગરિકે વિડીયો ઉતારી વાયરલ કર્યો છે. ડ્રેનેજની પાળી રિતસર પગ ઠોકવાથી હલી રહી છે. વાયરલ વિડીયો બાદ બૂમરાણ મચી જવા પામી છે.
